Եղբայրներ են դանակահրվել, որոնցից մեկը գտնվում էր հետախուզման մեջ՝ աղջկա առևանգման գորոծով

04-10-2017 19:28:12   | Լոռու մարզ  |  Իրավունք
 


 
ՀՀ քննչական կոմիտեի Լոռու մարզային քննչական վարչության Թումանյանի քննչական բաժնում հարուցվել է քրեական գործ՝ երկու անձի դանակահարության դեպքի առթիվ:
 
2017 թվականի հոկտեմբերի 03-ին՝ ժամը 02:40-ին, «Ալավերդու բժշկական կենտրոն» ՓԲ ընկերությունից ահազանգ է ստացվել առ այն, որ կտրած-ծակած վերքերով բժշկական կենտրոն է տեղափոխվել 2 տղամարդ: Պարզվել է, որ դանակահարվածները եղբայրներ են՝ ծնված 1982 և 1989թթ.:
 
Դեպքի առթիվ ՀՀ քննչական կոմիտեի Լոռու մարզային քննչական վարչության Թումանյանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով: Եղբայրները  ճանաչվել են  տուժող:
 
Ձեռնարկված անհետաձգելի քննչական գործողությունների արդյունքում պարզվել է եղբայրների՝ ծանր մարմնական վնաս ստանալու դեպքի վայրը, տվյալներ ձեռք բերվել՝ ենթադրյալ հանցագործություն կատարած անձի վերաբերյալ, և հանձնարարություն է տրվել ոստիկանությանը՝ միջոցներ ձեռնարկել նրան հայտնաբերելու և վարույթն իրականացնող մարմնին ներկայացնելու ուղղությամբ։ 
 
Քննությամբ պարզվել է նաև, որ դանակահարված եղբայրներից մեկը սեպտեմբերի 10-ից հետախուզման մեջ էր գտնվում՝ ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերով նախատեսված արարք կատարելու մեղադրանքով։ 
 
Ավելի վաղ տեղեկացրել էինք, որ 2017թ. սեպտեմբերի 7-ին ահազանգ էր ստացվել, որ նույն օրը՝ ժամը 19:30-ի սահմաններում, առևանգվել է Լոռու մարզի անչափահաս բնակչուհի՝ ծնված 1999թ։ Ձեռնարկված միջոցառումների արդյունքում պարզվել էր, որ աղջկան առևանգել էին Լոռու մարզի 4 բնակիչ. նրան նախ տեղափոխել էին Գյումրի, ապա՝ Երևան, այնուհետև՝  Էջմիածին։ 
 
Դեպքի առթիվ հարուցվել էր քրեական գործ՝ ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերի և 34-138-րդ հոդվածի 2-րդ մասի 3-րդ կետի հատկանիշներով:
 
Ձեռք բերված ապացույցների հիման վրա՝ Լոռու մարզի երկու բնակչի մեղադրանք էր առաջադրվել ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերի,  մեկին՝ ՀՀ քրեական օրենսգրքի 131-րդ հոդվածի 2-րդ մասի 1-ին և 4-րդ կետերի և 34-138-րդ հոդվածի 2-րդ մասի 3-րդ կետի հատկանիշներով: 4-րդ անձի նկատմամբ հայտարարվել էր հետախուզում։ Վերջինիս այսօր մեղադրանք է առաջադրվել՝ անչափահասի առևանգման գործով:
 
 
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
 
ՀՀ քննչական կոմիտե
Նոյյան տապան   -   Իրավունք
Լուրեր Հայաստանից եւ Սփյուռքից