Թուրքիայում ԱՄՆ-ին կոչ են արել վերանայել Թել Ավիվից Երուսաղեմ ամերիկյան դեսպանությունը տեղափոխելու որոշումը

06-12-2017 16:21:48   | Թուրքիա  |  Քաղաքական
 

Թուրքիայի վարչապետ Բինալի Յըլդըրըմը կոչ է արել ԱՄՆ նախագահ Դոնալդ Թրամփին վերանայել Իսրայելի Թել Ավիվ քաղաքից Երուսաղեմ ամերիկյան դեսպանատան տեղափոխման որոշումը: 
 
Interfax-ի փոխանցմամբ՝ նա, մասնավորապես, ասել է. «Մերձավոր Արևելքում Երուսաղեմը շատ զգայուն շրջան է: Նախագահ Թրամփն հանդես է եկել նման նախաձեռնությամբ, որն իմ կարծիքով՝ պետք է վերանայվի: Երուսաղեմը Սուրբ քաղաք է նաև մահմեդականների համար, և մեր կառավարությունը հույս ունի, որ այդ որոշումը չի սրի խնդիրները»:  
 
Թուրք վարչապետի խոսքերով՝ Թրամփի վերոնշյալ որոշումը կարող է իսրայելցիների և պաղեստինցիների միջև հարաբերություններում հանգեցնել հերթական լարվածությանը, նաև կոնֆլիկտ հրահրել տարբեր կրոնների ներկայացուցիչների միջև: 
 
Ավելի վաղ ԱՄՆ-ում հայտարարել են, որ կարող են Երուսաղեմը ճանաչել որպես Իսրայելի մայրաքաղաք, և այնտեղ տեղափոխել ամերիկյան դեսպանությունը:  
 
Իսրայելը Երուսաղեմը համարում է պետության մայրաքաղաք, սակայն աշխարհի շատ երկրներ հրաժարվում են ընդունել դա՝ նշելով, որ տվյալ հարցը պետք է լուծվի իսրայելցիների և պաղեստինցիների միջև անմիջական երկխոսության արդյունքում: 
 
Միաժամանակ Սպիտակ տնից հաղորդել են, որ ԱՄՆ նախագահը հեռախոսային առանձնազրույցներ է ունեցել Իսրայելի, Պաղեստինի, Հորդանանի, Եգիպտոսի և Սաուդյան Արաբիայի ղեկավարների հետ, որոնց ընթացքում քննարկել է Երուսաղեմի հետ կապված հնարավոր որոշումները: 

 
Նոյյան տապան   -   Քաղաքական
Լուրեր Հայաստանից եւ Սփյուռքից