«Մեր պայքարը Թուրքիայի դեմ չէ, մեր պայքարը հանուն մարդու իրավունքների պաշտպանության է». Էդուարդ Շարմազանով

06-03-2018 17:30:28   | Հայաստան  |  Մամլո հաղորդագրություն
ՀՀ ԱԺ նախագահի տեղակալ Էդուարդ Շարմազանովը մարտի 6-ին հանդիպել է եվրոպական տարբեր երկրների ալեւիների միության անդամներին: Հանդիպմանը ներկա են եղել նաեւ ՀՀ ԱԺ պատգամավորներ Կնյազ Հասանովը եւ Արսեն Միխայլովը:
Ողջունելով հյուրերին՝ ՀՀ ԱԺ փոխնախագահն ընդգծել է, որ ՀՀ իշխանությունները կարեւորում են կրոնական համերաշխությունը, ազգային ու կրոնական փոքրամասնությունների իրավունքների պաշտպանությունը: Այս համատեքստում ազգային փոքրամասնություններին հստակ քվոտա է տրված մեր երկրի խորհրդարանում: Էդուարդ Շարմազանովի խոսքով՝ հայ ժողովուրդը հասկանում է ազգային փոքրամասնությունների դերը եւ կարեւորում նրանց իրավունքների պաշտպանությունն ամբողջ աշխարհում, քանի որ Հայոց ցեղասպանությունից հետո հայության մի ստվար հատված ապաստան գտավ աշխարհի բազմաթիվ երկրներում:
 


«Մենք կհաջողենք, եթե միավորվենք հանուն կրոնական եւ ազգային փոքրամասնությունների իրավունքների պաշտպանության եւ ընդդեմ ցեղասպանությունների ու ժխտողականության: Մեր պայքարը Թուրքիայի դեմ չէ, մեր պայքարը հանուն մարդու իրավունքների պաշտպանության է»,-ընդգծել է ՀՀ ԱԺ նախագահի տեղակալը:
Նա անդրադարձել է նաեւ մի շարք երկրներում ՄԱԿ-ի գլխավոր ասամբլեայի կողմից «Ցեղասպանության հանցագործությունը կանխարգելելու եւ պատժելու մասին» կոնվենցիայի ընդունման 70-ամյակին նվիրված «Խորհրդարանականներն ընդդեմ ցեղասպանությունների» խորագրով միջոցառումների անցկացմանը, որը նախաձեռնել է Հայաստանի խորհրդարանը: Նա այս հարցում կարեւորել է եվրոպական տարբեր երկրներում ալեւիների միության ներկայացուցիչների ակտիվ մասնակցությունը:
Ֆրանսիայի ալեւիների միության նախագահ, եվրոպական տարբեր երկրների ալեւիների միության փոխնախագահ Էլդար Քլչքայան կարեւորել է Թուրքիայի կողմից անցյալի մեղքերը գիտակցելը՝ նշելով, որ 21-րդ դարը երկխոսելու ժամանակաշրջան է: Նա ներկայացրել է իրենց կազմակերպության գործունեությունն ու առաջիկա անելիքները: 
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 259 անգամ



Բաժանորդագրվեք «Նոյյան Տապան»-ի մեր էջերին
«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար
 
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար