«Աղքատության հաղթահարումը մենք պատկերացնում ենք աշխատանքը քաջալերելու մեջ». Նիկոլ Փաշինյան․168.am

11-08-2018 12:36:57   | Տավուշի մարզ  |  Մամուլի տեսություն
168.am ՀՀ կառավարությունն առաջնահերթություն է տալու աշխատանքը քաջալերելուն ուղղված ծրագրերին։ Այս մասին Իջևանում ինքնակառավարման մարմինների ներկայացուցիչների հետ հանդիպմանը հայտարարեց ՀՀ վարչապետ Նիկոլ Փաշինյանը։ Արձագանքելով Դիտավան համայնքի ղեկավարի բարձրացրած հարցին, որ կառավարության աջակցությամբ հիմնանորոգվի գյուղ տանող ճանապարհը, քանի որ համայնքային բյուջեն թույլ չի տալիս խնայողություններ անել և սուբվենցիաներ ստանալ՝ Նիկոլ Փաշինյանը նախ նշեց, որ այս համայնքի մասին այս օրերին շատ է լսել հաջողված տնտեսական գործունեություն իրականացնելու շնորհիվ, ապա ավելացրեց․
 


«Կառավարության քաղաքականության հիմնական նպատակը աշխատանքի քաջալերումն է, ոչ թե օգնություն տրամադրել, այլ պայմաններ՝ պատշաճ աշխատանքի համար։ Ես ուրախ եմ, որ ձեր համայնքում այսպիսի գործընթացներ են, կառավարությունը բոլոր հնարավոր միջոցները կքննարկի, որպեսզի հնարավոր դարձնի ճանապարհի նորոգումը»։
 
Նիկոլ Փաշինյանը կարևոր համարեց հանգամանքը, որ մարդիկ չաշխատեն նպաստ ստանալու համար, այլ աշխատեն՝ նպաստ ստացողների ցանկից դուրս գալու համար։
 
«Աղքատության հաղթահարումը մենք պատկերացնում ենք աշխատանքը քաջալերելու մեջ, որ մարդիկ իրենց գործունեությամբ հաղթահարեն աղքատությունը»,-նշեց վարչապետը։
 
Նա հույս հայտնեց, որ այս ընթացքում կկարողանան մեծ գումարներ գեներացնել և ուղղել ենթակառուցվածքների զարգացմանը։ «Ենթակառուցվածքների պատշաճ վիճակի ապահովումը կառավարության պարտավորությունն է։ Այսօր մեր կարևոր առաջնահերթություններից է ճանապարհների, խմելու և ոռոգման ջրի համակարգերի արդիականացումը»,-հավելեց վարչապետը։
 
Միևնույն ժամանակ Նիկոլ Փաշինյանը հայտնեց, որ առաջնահերթ են համարում Ջուջևան-Նոյեմբերյան ճանապարհահատվածի հիմնանորոգումը, քանի որ Վրաստան իր պաշտոնական այցի ժամանակ նաև այնտեղից իր գործընկերներից է լսել այդ ճանապարհի վերաբերյալ բողոքներ։
Նոյյան տապան   -   Մամուլի տեսություն
Լուրեր Հայաստանից եւ Սփյուռքից

Կարդացել են 732 անգամ



Բաժանորդագրվեք «Նոյյան Տապան»-ի մեր էջերին
«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար
 
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար