Մեղադրանքներ են առաջադրվել Մարտունի քաղաքի երկու բնակչի.ՀՔԿ

14-11-2018 16:01:19   | Գեղարքունինքի մարզ  |  Իրավունք
 


 
ՀՀ քննչական կոմիտեի Գեղարքունիքի մարզային քննչական վարչությունում ավարտվել է ապօրինի կերպով փամփուշտներ ձեռք բերելու, իրացնելու, պահելու, փոխադրելու, առանց իրացնելու նպատակի զգալի չափերով թմրամիջոցներ ապօրինի պատրաստելու, վերամշակելու, ձեռք բերելու, պահելու, գողության և  գողության օժանդակության դեպքերի առթիվ հարուցված քրեական գործի նախաքննությունը։ Ձեռք բերված ապացույցների հիման վրա՝ մեղադրանք է առաջադրվել երկու անձի:
Քննությամբ ձեռք բերված տվյալների համաձայն՝ 2016թ. աշնանը Գեղարքունիքի մարզի Մարտունի քաղաքի բնակիչ Ս.Մոսոյանը՝ ծնված 1976թ., Քելբաջար քաղաքի «Իստիսու» տաք ջուր կոչվող վայրում հայտնաբերել է ռազմամթերք հանդիսացող «Մակարով» տեսակի ակոսափող ատրճանակների, «ՊՊՇ» տեսակի ատրճանակ-գնդացիրների համար նախատեսված 4 հատ գործարանային արտադրության փամփուշտներ, որոնք նա տարել է տուն և պահել:
 
Բացի այդ, 42-ամյա տղամարդը 2017թ. աշնանը, առանց իրացնելու նպատակի, իր տան բակում աճեցրած կանեփի բույսերից ապօրինի ձեռք է բերել ու պահել զգալի չափերի՝ 2.94 և 2.500 գրամ հաստատուն քաշով «մարիխուանա» տեսակի թմրամիջոց:
Վերը թվարկվածից բացի, Ս.Մոսոյանն իր համաքաղաքացու՝ Ռ.Մաթևոսյանի հետ Մարտունի քաղաքի խանութներից մեկից գողություն կատարելու շուրջ պայմանավորվածություն է ձեռք բերել: Պայմանավորվածության համաձայն՝ 2018թ. մայիսի 23-ին՝ ժամը 02-ի սահմաններում, նրանք գնացել են նշված վայր:  Ըստ դերաբաշխման՝ Ս.Մոսոյանը  մնացել է դրսում՝ գողության բարեհաջող ընթացքը և ավարտն ապահովելու համար, իսկ Ռ.Մաթևոսյանը, տեխնիկական միջոցների գործադրմամբ կոտրելով խանութի պատուհանի ճաղավանդակը, ապօրինի մտել է խանութ և հափշտակել տարբեր տեսակի ապրանքներ և կանխիկ գումար:
Քննությամբ պարզվել է նաև Ռ.Մաթևոսյանի կողմից կատարված  հանցագործության ևս մեկ դրվագ: Մասնավորապես՝  2018թ. հունիսի 24-ին, վերջինս, տեղեկանալով, որ նախկին կինը մեկնելու է Ռուսաստանի Դաշնություն, և ծնողները նրան ուղեկցելու են և, հետևաբար, տանը չեն լինելու, մտադրվել է գողություն կատարել նրանց տանից: Իր մտադրությունն իրականացնելու համար նա իր ընկերոջ՝ Ս.Մոսոյանի  հետ հունիսի 25-ի գիշերը գնացել նախկին կնոջ՝ Բաղրամյան գյուղում գտնվող հայրական տուն, որտեղից գողացել է առանձնապես խոշոր չափերի՝ 3 512 700 ՀՀ դրամ ընդհանուր արժեքով գումար և ոսկյա զարդեր:
Ձեռք բերված ապացույցների հիման վրա՝ Ս.Մոսոյանին մեղադրանք է առաջադրվել ՀՀ քրեական օրենսգրքի 235-րդ հոդվածի 1-ին մասով, 268-րդ հոդվածի 1-ին մասով (2 դրվագ) և 38-177-րդ հոդվածի 2-րդ մասի 3-րդ կետով, իսկ Ռ.Մաթևոսյանին՝ ՀՀ քրեական օրենսգրքի ՀՀ քրեական օրենսգրքի 177-րդ հոդվածի 2-րդ մասի 3-րդ կետով և 177-րդ հոդվածի 3-րդ մասի 1.1 կետով:
Նախաքննությունը ավարտվել է, քրեական գործը՝ մեղադրական եզրակացությամբ, ուղարկվել է դատարան:
 
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ քննչական կոմիտեի դեպարտամենտի
տեղեկատվության և հասարակայնության
հետ կապերի բաժին
 
 
 
Նոյյան տապան   -   Իրավունք
Լուրեր Հայաստանից եւ Սփյուռքից

Կարդացել են 418 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար


Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար