Երկու հայ, որ տակնուվրա արեցին թյուրքական աշխարհը

18-05-2019 14:03:53   | Հայաստան  |  Ի՞նչ է գրում մամուլը
Մարզական աշխարհը տրամադրվում է սպորտի համար անսովոր երեւույթի. Ադրբեջանը, որտեղ մայիսի 29-ին պետք է կայանա Եվրոպա լիգայի եզրափակիչը, ինչպես գրում են լրատվամիջոցները, վիզա չի տրամադրում հայկական ազգանունով երկրպագուներին:
 


Հիշեցնենք, որ եզրափակիչում խաղալու են լոնդոնյան Արսենալն ու Չելսին: Արսենալի խաղացող Հենրիխ Մխիթարյանն ամենայն հավանականությամբ չի մեկնի Բաքու: Բայց ամենահետաքրքիրն այն է, որ երկրպագուներին առաջարկում են նրա բացակայությունը փոխհատուցել ֆլեշմոբերով՝ հագնել Մխիթարյանի համարով մարզաշապիկներ եւ խաղի ժամանակ վանկարկել նրա անունը:
 
Բաքվում Եվրոպա լիգայի եզրափակիչը կարող է վերածվել մեծ շփոթության: Բաքուն կարող են լցնել հազարավոր Մխիթարյաններ: Կստացվի, որ մեկ հայը կկարողանա «շրջել» երկիրը,
որն իր քաղաքականությունն ու ինքնությունը կառուցում է հայերին չընդունելու ու մերժելու վրա: Ինչ-որ պահի այդ ամբողջը պատռվում է, եւ Ադրբեջանը հառնում է իր «հանդուրժողականության» ողջ մերկությամբ:
 
Նույն օրերին մեկ այլ հայ՝ Գարո Փայլանը, բացահայտում է Թուրքիայի իրական դեմքը: Քրդամետ Ժողովուրդների դեմոկրատիա կուսակցության պատգամավոր Փայլանը Թուրքիայի խորհրդարանում ունեցած ելույթում անդրադարձել է փոքրամասնությունների նկատմամբ քաղաքականությանը եւ ասել, որ վերջերս Կոնստանդունպոլսի քաղաքապետ ընտրված Իմամօղլուին մեղադրում են հունական ծագման մեջ: Սա ռասիզմ է, ասել է պատգամավորը: «Ձեր պապերը, ձեզնից յուրաքանչյուրի, նույնպես կարող է հայ, հույն լինել: Դա չի կարելի ընդունել որպես վիրավորանք: Այս երկրի պատմությունը հայերը, հույները, թուրքերն ու քրդերն են», – ասել է նա:
 
Հիշատակումը, որ նրանց պապերը կարող են հայ լինել, սակրալ հայտարարություն է: Սա արյան, գենի կանչ է, որը չեն կարող փոխել ոչ իսլամը, ոչ գաղութացումը, ոչ արտաքսումը: Անգամ Ադրբեջանի «սեւ ցուցակները» չեն կարող կանգնեցնել հազարավոր «Մխիթարյանների», որոնք կժամանեն Բաքու:
 
 
ՆԱԻՐԱ ՀԱՅՐՈՒՄՅԱՆ, Մեկնաբան
 
 
 
Նոյյան տապան   -   Ի՞նչ է գրում մամուլը
Լուրեր Հայաստանից եւ Սփյուռքից

Կարդացել են 1218 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար