Բակո Սահակյանը «հանձնեց» վերջին հենարանը

27-05-2019 11:05:12   | Հայաստան  |  Ի՞նչ է գրում մամուլը
Արցախի Հանրապետության Նախագահ Բակո Սահակյանը մայիսի 25-ին հաստատել է Կառավարության որոշումը, համաձայն որի՝ Իվան Ավանեսյանն ազատվել է Հադրութի շրջանի վարչակազմի ղեկավարի պաշտոնից:
 


 
Իվան Ավանեսյանը Բակո Սահակյանի «պոլիտբյուրոյի» վերջին անդամն էր, ով մնացել էր պաշտոնին: Հայաստանում հեղափոխությունից հետո Արցախում սկսված բողոքի ալիքի արդյունքում Բակո Սահակյանը այս մեկ տարվա ընթացքում իրենց պաշտոններից հերթով հեռացրեց «պոլիտբյուրոյի» անդամներին, որը Բակո Սահակյանի հենարանն էր:
 
 
Բակո Սահակյանի հռչակած «ռեֆորմներն» այդքանով էլ ավարտվեցին: Ներկայում «պոլիտբյուրոյի» անդամների մի մասի անունները պարբերաբար հայտնվում են հայկական մամուլում, հիմնականում «ռեւանշիզմի» կտրվածքով, թեեւ դա իհարկե չափազանցված է: Գործ ունենք այլ իրավիճակի հետ, երբ նրանցից ոմանք պարզապես փորձում
են կառչել ինչ որ հնարավորություններից, ինչ որ վախերից կամ մտահոգություններից դրդված:
 
Ինքը Բակո Սահակյանը վերջին մեկ տարում հայտնվեց բարդ ու անորոշ իրավիճակում, «կիսվելով» նորի ու հնի միջեւ: Հանուն արդարության պետք է ասել, որ նրան հաջողվեց որոշակի հավասարակշռություն ու կայունություն ապահովել, բնականաբար Հայաստանի նոր իշխանության աջակցության պայմաններում:
 
Այս մեկ տարվա մեջ թերեւս ամենաաղմկոտ դրվագը Քոչարյանին կալանքից ազատելու միջնորդությունն էր Երեւանի դատարանում, որ սակայն հետագայում կպարզվի, թե ինչ սխեմայով է իրականացվել:
 
Բակո Սահակյանն այս ընթացքում առնվազն մեկ անգամ մոտ էր հրաժարականին: Նրա պաշտոնավարմանը մնացել է մոտ մեկ տարի, որից հետո պետք է տեղի ունենան Արցախի նախագահի ընտրություններ: Բակո Սահակյանը խոստացել է, որ չի առաջադրվելու:
 
Արցախում նախկին իշխող համակարգի ապամոնտաժումը անխուսափելի է եւ տեղի է ունենում բավական սահուն, չհաշված մի քանի մանր սկանդալները: Ներկայում ծավալվում է շարժում,
որն իր առջեւ խնդիր է դրել ապահովել ազատ ու արդար ընտրություններ Արցախում:
 
Բակո Սահակյանը, որքան էլ տարօրինակ հնչի, «հանձնելով պոլիտբյուրոյին», դարձավ նախագահ, եւ նրա միակ հենարանը դարձել են Արցախի Սահմանադրությունն ու օրենքները: Բակո Սահակյանը կարող է պատվով ավարտել իր նախագահությունը, դառնալով Սահմանադրության ու օրենքների երաշխավոր:
 
 
 
 
Նոյյան տապան   -   Ի՞նչ է գրում մամուլը
Լուրեր Հայաստանից եւ Սփյուռքից

Կարդացել են 1023 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար