Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ՆԱԽԱԳԱՀԵՑ ԴՊՐԵՎԱՆՔԻ ՈՒՍՈՒՑՉԱՑ ՀԱՆԴԻՊՈՒՄԻՆ

19-06-2019 18:00:38   | Լիբանան  |  Մամլո հաղորդագրություն
 

Այսօր՝ Չորեքշաբթի, 19 Յունիս 2019-ին, Մեծի Տանն Կիլիկիոյ Կաթողիկոսութեան Դպրեվանքէն ներս տեղի ունեցաւ Դպրեվանքի ուսուցչաց հանդիպումը կրթական տարեփակին առիթով: Բնականաբար, հանդիպման նպատակն էր ընդհանուր արժեւորումի ենթարկել Դպրեվանքի 2018-2019 կրթական տարեշրջանի ուսումնական աշխատանքը, աշակերտներու՝ դասարան առ դասարան եւ աշակերտ առ աշակերտ կատարած աշխատանքը եւ ապա ճշդել յառաջիկայ կրթական շրջանին ծրագիրին ու կատարուելիք աշխատանքին ընդհանուր ուրուագիծը:
 
Վեհափառ Հայրապետը ողջունելով
Դպրեվանքի ուսուցչական կազմը իր բարձր գնահատանքը փոխանցեց անոնց հայ ուսուցիչի յատուկ նուիրումով ու բծախնդրութեամբ կատարած իրենց կրթադաստիարակչական աշխատանքին համար: Ապա խօսելով Դպրեվանքին մասին Նորին Սրբութիւնը յիշեցուց, թէ Դպրեվանքը սովորական դպրոց մը չէ իր կրթական ծրագիրով, իր միջավայրով եւ իր նպատակով: Ան վաղուան հոգեւորականի, ուսուցիչի, մտաւորականի հոգեմտաւոր կազմաւորման լծուած առաքելութիւն է: Այս մօտեցումով պէտք է ուսուցիչը կատարէ իր դերը Դպրեվանքէն ներս:
 
Վեհափառ Հայրապետը նաեւ անդրադարձաւ Դպրեվանքի ներքին կրթական կեանքին եւ արտադասարանային աշխատանքներու առնչուած կարգ մը երեւոյթներու՝ կատարելով անհրաժեշտ թելադրութիւնները: Ան յատկապէս շեշտեց աշակերտին լեզուամտածողութիւնը, քննական ու վերլուծական մօտեցումը խորացնելու ու զարգացնելու կարեւորութիւնը: Միաժամանակ յիշեցուց Դպրեվանքի կրթական ծրագիրը վերատեսութեան ենթարկելու հրամայականը նոր ժամանակներու ու մարտահրաւէրներու լոյսին տակ:
 
Յայտնենք, որ Նորին Սրբութիւնը իր աբեղայութեան տարիներէն սկսեալ մինչեւ այսօր, Դպրեվանքէն ներս եղած է ուսուցիչ: Ան այսօր եւս կը դասաւանդէ աստուածաբանութիւն Դպրեվանքի աւարտական դասարանին:
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 484 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար