ԵՊԲՀ բարձր առաջադիմությամբ ավարտած շրջանավարտները ստացել են կարմիր դիպլոմներ

12-07-2019 15:47:57   | Հայաստան  |  Մամլո հաղորդագրություն
 


Մխիթար Հերացու անվան պետական բժշկական համալսարանի բարձր առաջադիմություն ունեցող 53 շրջանավարտներն այսօր կարմիր դիպլոմներ ստացան 100-ամյա պատմություն ունեցող քաղաքային հիվանդանոցի շենքում բացված Արցախի հերոս Ռոբերտ Աբաջյանի անվան լսարանում: 
 
Կարմիր դիպլոմները շրջանավարտներին հանդիսավորությամբ հանձնեցին անվանի պրոֆեսորներն, սիրված դասախոսներն ու ֆակուլտետների դեկանները: 
 
ԵՊԲՀ ռեկտոր Արմեն Մուրադյանի խոսքով՝ ավարտական քննությունները սկզբունքային և առանցքային նշանակություն ունեն, և արվել է ամեն ինչ, որ դրանք համապատասխանեն միջազգային չափորոշիչներին: «Մենք պետք է կարողանանք հանգիստ խղճով ձեզ գործընկերներ կոչել և վստահ լինեք, որ կարող եք իրականացնել այն բոլոր
նպատակներն ինչի համար անցել եք այս դժվարին ճանապարհը»,- ասաց ռեկտորն՝ ընդգծելով, որ բժշկի համար վստահություն առաջացնելը մեծ պատիվ է, իսկ այդ վստահությունն արդարացնելը՝ պարտականություն: 
Արմեն Մուրադյանը հույս հայտնեց, որ այսպիսի ավանդույթները կգեղեցկացնեն Բժշկական համալսարանի պատմությունը և հիշարժան կլինեն բժշկական բուհն ավարտած յուրաքանչյուր ուսանողի համար: «Այսօր տեղի կունենա նաև ԵՊԲՀ ռազմաբժշկական ֆակուլտետի 25-ամյակին նվիրված տոնակատարությունը, ինչպես նաև, ավանդույթի համաձայն, ԵՊԲՀ անվանական կրթաթոշակառուներն ու ռազմաբժշկական ֆակուլտետի շրջանավարտ կուրսանտները կստանան իրենց ավարտական դիպլոմները: Կեցցե՛ք դուք, որ արժանացաք Մխիթար Հերացու անվան պետական բժշկական համալսարանի կարմիր դիպլոմների»,- ասաց ռեկտորը՝ համոզմունք հայտնելով, որ ԵՊԲՀ յուրաքանչյուր շրջանավարտ նվիրավածությամբ կիրականացնի իր առաքելությունը:
 
100-ամյա բուհի կայացման ու հաջողությունների ակնքներում կանգնած ուսուցիչների խորհրդի համաձայն՝ ամեն նոր սերունդ պարտավոր է լավը լինել նախորդից, և այսօրվա սերունդն այդպիսի մեծ առաքելություն ունի: Բուհի նվիրյալները բարձր առաջադիմությամբ ավարտած ապագա բժիշկներին կոչ արեցին նայել միայն առաջ, քանի
որ բժշկությունը հիմնված է փորձի, ինչպես նաև զարգացող գիտելիքների վրա: «Միշտ առաջնորդվեք «Մի՛ վնասիր» սկզբունքով: Իսկ դա հնարավոր է, եթե ունեք պատվարժան ուսուցիչներ և գիտելիքներ»,- եզրափակեց ԵՊԲՀ ռեկտոր Արմեն Մուրադյանը:
 
Նշենք, որ ԵՊԲՀ 923 շրջանավարտ Հիպոկրատի երդումով խոստացել են հավատարիմ մնալ բժշկի կոչմանը՝ հպարտությամբ կրելով բժշկի սպիտակ համազգեստը: 
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից

Կարդացել են 452 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար