Բորիս Բերեզովսկին և աշխարհահռչակ այլ մենակատարներ ելույթ կունենան «Ժամանակակից դասականներ» փառատոնի շրջանակներում

18-10-2019 14:32:35   | Հայաստան  |  Մշակույթ
 


 
Աշխարհահռչակ մենակատարների մի իսկական աստղաբույլ կհյուրընկալվի Հայաստանում։ Դաշնակահար Բորիս Բերեզովսկին, ալտահար Յուրի Բաշմետը, ջութակահարներ Գիդոն Կրեմերը, Նինգ Ֆենգը, թավջութակահար Մարիո Բրունելոն, ֆրանսաբնակ ջութակահար Շուշան Սիրանոսյանը և բազմաթիվ այլ մեծանուն մենակատարներ ելույթ կունենան Երևանում դասական երաժշտության սիրահարների համար՝ նոյեմբերի 1-9 անցկացվելիք «Ժամանակակից դասականներ» կոմպոզիտորական փառատոնի շրջանակներում։ Փառատոնը համախմբելու է նաև մեր օրերի
հայտնի կոմպոզիտորների՝ Տիգրան Մանսուրյանին, Ցիգան Չենին, Քշիշտոֆ Պենդերեցկուն, Ալեքսեյ Շորին, Գեորգս Պելեցիսին, Ալեքսանդր Չայկովսկուն և Կառլ Ջենկինսին։ 
 
Փառատոնի շրջանակներում իրենց կատարումներով հանդես կգան նաև ջութակահար Ջու-Յոնգ Բիքը, թավջութակահարներ Գիեդրե Դիրվանաուսկայտեն, Կլաուդիո Բոհորքեսը, Վիկտոր Ժուլիեն Լաֆերիերը, դաշնակահարներ Ռեմի Ժընիեն, Ինգոլֆ Վունդերը, Ռոբերտո Կոմինատին, Կոնստանցիա Պրինչիպեն, Դարիա Չայկովսկայան։ «Ժամանակակից դասականներ» կոմպոզիտորական փառատոնը կներկայանա կոմպոզիտորներից յուրաքանչյուրին նվիրված առանձին երեկոյով, որի ընթացքում կհնչեն հեղինակների լավագույն սիմֆոնիկ ստեղծագործությունները։ 
 
Փառատոնը համախմբել է նաև հայաստանյան կոլեկտիվների. աշխարհահռչակ մենակատարների հետ ելույթ կունենան Հայաստանի պետական սիմֆոնիկ նվագախումբը, Հայաստանի ազգային ֆիլհարմոնիկ նվագախումբը, Հայաստանի ազգային ակադեմիական երգչախումբը, Երևանի ձայնի պահպանման վոկալ-երգչախմբային դպրոցի երգչախումբը, «Այբ՚ դպրոցի երգչախումբը։
 
«Ժամանակակից դասականներ» կոմպոզիտորական փառատոնը կազմակերպել են Հայաստանի պետական սիմֆոնիկ նվագախումբը, Մշակույթի աջակցության եվրոպական հիմնադրամը՝ ՀՀ կրթության, գիտության, մշակույթի և սպորտի նախարարության աջակցությամբ։
 
Նոյյան տապան   -   Մշակույթ
Լուրեր Հայաստանից եւ Սփյուռքից

Կարդացել են 808 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար