Ըստ Աբել Աղանբեգյանի, համաշխարհային ճգնաժամին դիմակայելու համար պետք է զարկ տալ փոքր եւ միջին բիզնեսին | Noyan Tapan Information Analytical center

ԵՐԵՎԱՆ, 25 ՄԱՅԻՍԻ, ՆՈՅՅԱՆ ՏԱՊԱՆ:«Policy Forum Armenia» միջազգային կազմակերպության նախաձեռնությամբ Հայաստանի Ամերիկյան համալսարանում մայիսի 25-ին կազմակերպված «Հայաստան. դիմակայելով համընդհանուր աղետին» տնտեսագիտական ֆորումի նպատակն էր քննարկել ֆինանսատնտեսական ճգնաժամի հնարավոր ազդեցությունն ու դրա հետեւանքները, ինչպես նաեւ նախանշել ճգնաժամի ազդեցությունը մեղմելուն ուղղված գործողություններ: Ֆորումին մասնակցում էին միջազգային ֆինանսական կազմակերպությունների ներկայացուցիչներ, համաշխարհային ճանաչում ունեցող տնտեսագետներ տարբեր երկրներից:

Ֆորումի բացմանը անցկացված հեռուստակամուրջի ժամանակ ՌԴ Գիտությունների ակադեմիայի ակադեմիկոս Աբել Աղանբեգյանը նշեց, որ թեեւ պարզ չէ, թե համաշախարհային ֆինանսատնտեսական ճգնաժամը երբ կավարտվի, սակայն, նրա կարծիքով, շատերը հնարավորություն կունենան ճգնաժամից դուրս գալ ավելի ուժեղացած, իրենց դիրքերն ավելի ամրապնդած: «Դրա համար հարկավոր է օգտագործել այն հնարավորությունները, որոնք տալիս է ճգնաժամը»,- նշեց Ա.Աղանբեգյանը:

Ըստ ակադեմիկոսի, ԱՊՀ երկրներում ճգնաժամին դիմակայելու համար պետք է զարկ տալ փոքր եւ միջին բիզնեսին, ինչը նախ հնարավորություն կտա ստեղծել աշխատեղեր, ինչպես նաեւ կնպաստի տնտեսության աշխուժացմանը: «Դեռ շուտ դուրս չենք գալու այս ճգնաժամից»,- ընդգծեց ակադեմիկոսը` հավելելով, որ հույսը չպետք է կորցնել, պետք է պահպանել հավատը, բայց միեւնույն ժամանակ պատրաստ լինել նաեւ վատթարագույնին:

ԵԱՀԿ-ի հայաստանյան գրասենյակի ղեկավար, դեսպան Սերգեյ Կապինոսի խոսքերով, ճգնաժամից դուրս գալու համար հնարավոր չէ համընդհանուր դեղամիջոց գտնել, եւ երկիր ինքը պետք է մշակի իր քաղաքականությունն ու գործիքները: Նա ընդգծեց, որ պետք է խթանվի նաեւ տարածաշրջանային եւ միջազգային համագործակցությունը` նպատակաուղղված միջազգային լուծումներին եւ հնարավոր տարածաշրջանային տնտեսական բլոկների ձեւավորմանը:

Հասմիկ Հակոբյան

Հայաստանի առցանց լրատվամիջոցներ

Սփյուռքի հայկական առցանց լրատվամիջոցներ