ԵՐԵՎԱՆ, 9 ԱՊՐԻԼԻ (ՆՈՅՅԱՆ ՏԱՊԱՆ): ՀՀ հյուսիս-արեւելյան սահմանագոտում վերջին օրերի լարվածությունը առայժմ չի թուլանում: Միայն ապրիլ ամսվա առաջին 8 օրերի ընթացքում սահմանի այդ հատվածում սադրիչ գործողությունները կրկնվել են 13 անգամ: Բոլոր դեպքերում էլ հակառակորդը արժանի հակահարված է ստացել, բայց Ադրբեջանի Զինված ուժերի կողմից կատարվող ոտնձգությունները կարծես թե տխուր օրինաչափություն են դառնում: Բացառություն չէր նաեւ անցած օրը, երբ Ադրբեջանի Զինված ուժերի ստորաբաժանումները ժամը 13:40-17:00-ը ինչպես խոշոր տրամաչափի, այնպես էլ հրազենային տարատեսակ զենքերով հրետակոծության թիրախ են դարձրել Տավուշի մարզի Այգեպար, իսկ ժամը 17:00-18:40-ը` Բերքաբեր եւ Կիրանց բնակավայրերի պաշտպանական դիրքերը: ՀՀ Պաշտպանության նախարարության Լրատվության ու մամուլի վարչությունից հայտնեցին, որ տուժածներ չկան: Հայաստանի Զինված ուժերի ստորաբաժանումների պատասխան գործողություններից հետո հակառակորդը դադարեցրել է կրակը:

---