Հայաստանում սպառողների ֆինանսական գրագիտությունը շատ ցածր է, ինչից օգտվում են ֆինանսական կազմակերպոթյունները` բանկերը, ապահովագրական եւ վարկային ընկերությունները, եւ ոտնահարում քաղաքացիների իրավունքները: Այս մասին լրագրողների հետ մարտի 15-ի հանդիպմանը նշել է Հայաստանի ֆինանսական համակարգի հաշտարար Փիրուզ Սարգսյանը: «Որպես կանոն, մարդիկ պայմանագիր կնքելիս չեն կարդում դրանք: Երբեմն էլ պայմանագրերն այնքան անհասկանալի են ձեւակերպված, որ նույնիսկ մասնագետներն էլ չեն հասկանում»,- նշել է նա, նկատելով, որ քաղաքացիներն իրենք պետք է հետեւողական լինեն իրենց իրավունքների պաշտպանության հարցում: Իր եռամյա գործունեության ընթացքում Ֆինանսական համակարգի հաշտարարի կողմից քննության առնված դիմումների 70 տոկոսի դեպքում ընդունվել է որոշում հօգուտ քաղաքացու, ըստ Փ.Սարգսյանի, միջազգային պրակտիկայում 50 տոկոսն էլ արդեն շատ լավ ցուցանիշ է համարվում:

---