Սեպտեմբերի 1-ից Ռուսաստանը վերացնելու է Թուրքիայից որոշ բանջարեղենների մատակարարման արգելքը
31-08-2017 16:22:47 | Ռուսաստան | Տնտեսություն
Սեպտեմբերի 1-ից Ռուսաստանը վերացնելու է Թուրքիայից որոշ բանջարեղենների (բադրիջան, պղպեղ և դդում) մատակարարման արգելքը:
Interfax-ի փոխանցմամբ` ՌԴ գյուղատնտեսության նախարար Ալեքսանդր Տկաչևը հաղորդել է, որ վերոնշյալ որոշումը կայացվել է «Անասնաբուժական և ֆիտոսանիտարական վերահսկողության դաշնային ծառայության » (Ռոսսելխոնադզորի) մասնագետների կողմից այս տարվա մայիսին թուրքական ընկերություններում իրականացված ստուգումների արդյունքում:
«Մենք ակնկալում ենք, որ մեր թուրք գործընկերներն իրենց շուկա կընդունեն ռուսական արտադրության տավարի միս և թռչնամիս: Սահմանափակումների վերացումը պետք է երկուստեք իրականացվի և լինի փոխադարձ»,- հայտարարել է ռուս պաշտոնյան:
Անդրադառնալով թուրքական տոմատի մատակարարմանը` նախարար Տկաչևը հայտարարել է, որ այդ հարցում տարակարծություն և վեճեր կան:
Նա նշել է, որ Թուրքիան պաշտպանում է ռուսաստանյան շուկա լոլիկ մատակարարելու իր իրավունքը, քանի որ դա այդ երկրում գյուղատնտեսական արտադրանքի ներմուծման հիմնական կատեգորիաներից մեկն է:
Իսկ Ռուսաստանը պաշտպանում է իր շահերը` միաժամանակ պաշտպանելով իր արտադրողներին, ովքեր ակտիվորեն զբաղվում են բանջարեղենի աճեցմամբ և նոր ջերմոցային համալիրների կառուցմամբ:
ՀԱՅԵՐԵՆ
Русский
English
Դաս. հայերեն
French
