Երևանի քաղաքապետի ընտրություններում Փաշինյանի քայլն անընդունելի է. քաղաքապետի թեկնածու Անահիտ Թարխանյան (տեսանյութ)
12-09-2018 21:56:02 | Հայաստան | Քննարկում
«Երևանի հանրություն» դաշինքը ձևավորված է «Գալա» կուսակցության, «Հայաստանի կանաչների կուսակցության», ինչպես նաև 12 հասարակական կազմակերպության կողմից: Այս մասին սեպտեմբերի 12-ին «Նոյյան Տապան»-ի ուղիղ եթերում հեռարձակվող «Քննարկում» հաղորդաշարի ընթացքում տեղեկացրեց «Երևանի հանրություն» դաշինքից քաղաքապետի թեկնածու, ճարտարապետ, քաղաքաշինարար Անահիտ Թարխանյանը: Ըստ նրա, բոլորը երկար տարիներ զբաղվել են Երևանի տարբեր խնդիրների լուծմամբ, մայրաքաղաքի շահերի պաշտպանությամբ:
«Իհարկե, մենք այսօր ներկայացնում ենք Երևանի հանրությունը,- ասաց Անահիտ Թարխանյանը:- Ամեն տեղ, արտասահմանում ընդունված է, որ քաղաքները կառավարվում են հանրության կողմից, քաղաքները ղեկավարվում են հանրության կողմից վստահված և ճանաչված մարդիկ: Հայաստանում, հակառակ դրան, արդեն 2009 թվականից համայնքները, տվյալ դեպքում` Երևանը, Գյումրին և Վանաձորը, ղեկավարվում են տարբեր կուսակցությունների, քաղաքական ուժերի կողմից: Մեր նախաձեռնության հիմնական պայքարը, սկզբունքը, ինչի համար մենք սկսեցինք մասնակցել այս ընտրություններին, այն մոտեցումն է, որ Երևանը պետք է ղեկավարվի մասնագետների կողմից, մարդկանց կողմից, ովքեր երկար տարիների ընթացքում վստահություն են ձեռք բերել որպես քաղաքացիական հանրության պաշտպաններ»:
Օրերս հասարակությանն ու համացանցը փոթորկեց Երևանի քաղաքապետ Հայկ Մարությանի այն ձևակերպումը, որ հասարակությունը բաժանվել է սևերի ու սպիտակների: Այն ոմանց կողմից գնահատվեց վրիպում, ասացին, որ իբրև ճիշտ չի արտահայտվել, քանի որ հասարակության մեծամասնությունը շատ վատ վերաբերվեց Մարությանի այդ վտանգավոր բաժանմանը: Այնուհանդերձ, նշված բաժանումը, դրա հետ կապված խմորումները շարունակվում են, այսպիսով սեպ է խրվում հասարակության մեջ, և այդ իրավիճակում է ընթանում Երևանի քաղաքապետի ընտրությունների քարոզարշավը:
Անդրադառնալով այս ամենին ու պատասխանելով հարցին, թե իսկապե՞ս սևերի ու սպիտակների է բաժանվում հասարակությունը, այժմ քարոզարշավի մեջ գտնվող Երևանի քաղաքապետի թեկնածու Անահիտ Թարխանյանն ասաց.
«Մենք զգում ենք, որ Երևանի հանրությունը բազմաթիվ կարծիքների, բազմաթիվ մոտեցումների, մտածելակերպի հանրություն է, և դրանում է Երևան քաղաքի արժեքը, մենք պետք է գնահատենք, ինչքան ավելի շատ կարծիք կա, ինչքան ավելի շատ տեսակետներ կան: Ես կարող եմ համաձայն չլինել այս կամ այն տեսակետի հետ, բայց ինձ համար հարստություն է մարդու անձնական տեսակետ ունենալը: Իհարկե, մենք պետք է փայփայենք, անենք ամեն ինչ, որ ամեն մի անձ ունենա իր մոտեցումը, իր զարգացումը»:
Ըստ «Քննարկում» հաղորդաշարի հյուրի, Երևանի ընտրվելիք քաղաքապետը, հանրային և քաղաքական ուժերը պետք է մարդկանց միավորեն, միախմբեն ամենագլխավոր գաղափարի` Երևան մայրաքաղաքի գաղափարի շուրջ:
«Ես շատ դեմ եմ Հայկի արտահայտությանը, և գտնում եմ, որ դա վրիպակ չէր, դա լուրջ, խորքային մտածելակերպ էր,- ասաց Անահիտ Թարխանյանը:- Չի կարելի բաժանել իրականությունը սև ու սպիտակների»:
«Քննարկում» հաղորդաշարի հյուրի հավաստմամբ, այն, որ Հայկ Մարությանի ասածը վրիպակ չէր, փաստում է նրա օգտին այսօր իրականացվող քարոզարշավը:
«Գիտեք, վարչապետն իրավունք չունի մասնակցել քաղաքապետի ընտրություններին, վարչապետը` մեր կողմից այդքան բարձր դիրքում գտնվող պարոն Փաշինյանը, որը կողքին մենք բոլորս էինք կանգնել, բոլորս գնացինք կանգնեցինք Փաշինյանի կողքը, այսօր տարօրինակ ձևով փորձում է օգտագործել Երևանի քաղաքապետի ընտրությունները որպես վստահության քվե, որպես վստահության քարոզարշավ իր հանդեպ, դա անընդունելի է… Նախ սկսենք, որ հավասար չեն պայմանները, շատ մեծ վարչական ռեսուրս է օգտագործված: Այն, ինչի դեմ մենք մեր ամբողջ կյանքը պայքարել ենք, այն, ինչի դեմ մենք բոլորս անընդհատ խոսացել ենք, դա մնում է առանց փոփոխության»:
Պատասխանելով հեռուստադիտողներից մեկի հարցին և իրեն ուղղված նախատինքին, թե ինքն ինչո՞վ է վստահ, որ սևերի ու սպիտակների մասին խոսելով, Հայկ Մարությանը նկատի ուներ ժողովրդին, երբ ինքը` Թարխանյանը, շատ լավ գիտե, թե նա ում նկատի ուներ, հետևաբար պետք չէ դրա պատճառով ինչ-որ սև բան թափել Մարությանի վրա, վատաբանել նրան, Անահիտ Թարխանյանն ասաց.
«Դուք մոռացել եք կամ ուզում եք անտեսել իր խոսքերը, որ ամեն մեկը, որը որոշում է կանգնել մեր կողքը, մեր հետ է, ով որ կանգնում է մեր դեմ, մեր թշնամին է»:
Հեռուստադիտողին հռետորական հարց ուղղելով, թե ուրիշ ի՞նչ կերպ պետք է հասկանանք, որ Մարությանը խոսում է ոչ միայն քաղաքական ուժերի մասին, «Քննարկում» հաղորդաշարի հյուրը խնդրեց բաց աչքերով նայել իրականությանը:
Ըստ Անահիտ Թարխանյանի, Փաշինյանն այսօր ներկայացնում է ողջ Հայաստանը, ողջ Երևանի հանրությունը, և եթե ինքն այդքան մտահոգ է Երևան քաղաքին արժանի, արդար ընտրությունների կայացմամբ, ինքը պետք է, առաջին հերթին, կանգնած լինի ոչ թե միայն Հայկի կողքը, այլ բոլոր ընտրողների կողքը և քաղաքապետի բոլոր թեկնածուների կողքը:
Երևանի ժամանակով ժամը 10:00-ից 11։00-ը հաղորդմանը կարելի էր հետևել ԱՄՆ հայկական AABC հեռուստաընկերության ուղիղ եթերում, ինչպես նաև առցանց՝ «Նոյյան Տապան»-ի www.nt.am կայքով, «Նոյյան Տապան» հեռուստաընկերության Youtube-յան ալիքով, «Նոյյան Տապան» ֆեյսբուքյան էջում և «Noyan Tapan» ֆեյսբուքյան խմբում։
Ուղիղ եթերից հետո բանախոսին ուղղված հարցերն ու մեկնաբանությունները կարելի է թողնել՝ զանգհարելով ամերիկյան 818 9675321 և հայաստանյան 060 351131 հեռախոսահամարներով։ Ձեր խոսքի ձայնագրությունները հետագայում կօգտագործվեն «Հետադարձ կապ» հաղորդաշարում։
Մանրամասները` տեսանյութում
Հաղորդումները ուղիղ հեռարձակմամբ կարելի է դիտել Նոյյան Տապան Ալիքով, որը հեռարձակվում է հետույալ մալուխային ցանցերով․
Հաղորդման ուղիղ հեռարձակման ընթացքում կարելի է զանգահարել եւ հարցեր ուղղել բանախոսներին ամերիկյան 818 967 53 21 եւ հայաստանյան +374 60 35 11 31 հեռ/համարներով, Wiber, WhatsApp +374 55 50 90 75 համարով:
«Նոյյան Տապան»-ին աջակցել ցանկացողները կարող են մուտք գործել համապատասխան բաժինը հետեւյալ հղումներով
Սիրելի հայրենակիցներ, մենք շատ ուրախ ենք տեսնել ձեր գրառումները եւ քննարկումները, սակայն հայհոյանքները ջնջվելու են, իսկ գռեհիկ գրառումների հեղինակները արգելափակվելուեն։
ՀԱՅԵՐԵՆ
Русский
English
Դաս. հայերեն
French
