«Բիզնես էթիկայի պարզ արվեստը» ներկայացնում է գործարար հարաբերությունների ողջ ներկապնակը
26-12-2018 12:46:20 | Հայաստան | Նոր գրքեր
Թամարա Ավանեսյանի «Բիզնես էթիկայի պարզ արվեստը» գիրքը ներկայացվեց ընթերցողներին: Գործարար հարաբերությունների ողջ ներկապնակն իր մեջ ամփոփող գրքի շնորհանդեսը տեղի ունեցավ դեկտեմբերի 25-ին: Բացի բուն շնորհանդեսից, միջոցառման ընթացքում անցկացվեց նաև թրեյնինգ՝ ինչպես ճիշտ վարել գործնական հանդիպումներ և ինչպես մասնակցել աշխատանքային հարցազրույցին թեմաներով: Նշենք, որ գիրքը լույս է ընծայել «Էդիթ Պրինտ» հրատարակչությունը:
«Գրքի շնորհիվ բիզնես հասարակությունը կծանոթանա բիզնես էթիկայի կանոններին, կկիրառի դրանք և մեծ հաջողությունների կհասնի դրանց շնորհիվ: Հեղինակը փաստում է՝ գիրքը գրված է պարզ լեզվով, որպեսզի հասանելի լինի ցանկացած մասնագիտության տեր անձի համար»,-շնորհանդեսի մեկնարկին նշեց «Էդիթ Պրինտ» հրատարակչության հասարակայնության հետ կապերի պատասխանատու Ռոզա Գրիգորյանը:
Գրքի հեղինակ Թամարա Ավանեսյանը, ով մասնագիտությամբ իրավաբան է և հաշվապահ, ներկաներին պատմեց, որ բիզնես էթիկայի մասին գիրքը գրելու մտահաղացնումը նրա մոտ առաջացել է այն ժամանակվանից, երբ նա սկսել է հաճախել էթիկայի դպրոց:
«Ուսումնասիրելով ոլորտը՝ հասկացա, որ հայերենով բիզնես էթիկային առնչվող գրականոթյուն ընդհանրապես չկա, և որոշեցի գիրք հեղինակել»,-նշեց նա՝ հավելելով, որ այս ընթացքում բազում կրթական հաստատություններից հրավերներ է ստացել՝ բիզնես էթիկայի դասեր անցկացնելու առաջարկով:
Լինելով բիզնես ոլորտում՝ Թամարան գիրքը գրելուց առաջ նկատել էր, որ կազմակերպությունների հիմնական մասն անգամ չգիտի, թե ինչ է բիզնես էթիկան: Գրքի հեղինակն ուրախությամբ հավելեց, որ այսօր Հայաստանում որոշ կազմակերպություններ արդեն իսկ սկսել են կիրառել են բիզնես էթիկայի կանոնները: Անգամ որոշ կազմակերպությունների աշխատողների պահանջների բնութագրերում նշված է, որ բիզնես էթիկայի իմացությունը պարտադիր է, ինչը բավականին ոգևորող է:
Շնորհանդեսի շրջանակում Ավանեսյանն առանձնահատուկ շեշտեց՝ հաջողությունն ունի գաղտնիք, և այդ գաղտնիքը հենց բիզնես էթիկան է, որը շատ կարևոր է: Նա անկեղծացավ, որ արդեն իսկ աշխատում է իր հաջորդ գրքի վրա: Այն նվիրված է լինելու հաջողակ կանանց:
ՀԱՅԵՐԵՆ
Русский
English
Դաս. հայերեն
French
