2018-ին Հայաստանում տեղի ունեցած քաղաքական փոփոխություններն էական ազդեցություն են ունեցել բնակարանների գների թանկացման վրա (ՏԵՍԱՆՅՈՒԹ)
16-05-2019 14:15:09 | Հայաստան | Հասարակություն
Նախորդ տարի Հայաստանում տեղի ունեցած քաղաքական փոփոխություններն էական ազդեցություն են ունեցել երկրում բնակարանների գների թանկացման վրա:
Այս մասին մայիսի 16-ին կայացած կառավարության նիստից հետո լրագրողների հետ ունեցած ճեպազրույցում նշել է Անշարժ գույքի կադաստրի կոմիտեի ղեկավար Սարհատ Պետրոսյանը:
Ըստ նրա՝ բնակարանների թանկացման մյուս պատճառը հիփոթեքի շուկայի ակտիվացումն է:
«Մենք այսօր ունենք միջինը 6,5 նվազագույն տոկոսադրույքով հիփոթեքային վարկեր, որն անհամեմատելի է մեկ տարի առաջ եղած տվյալների հետ: Եվ երրորդ պատճառը, մասնավորապես Երևան քաղաքում և ոչ միայն, կոռուպցիոն սխեմաների վերցաման արդյունքում շատ ավելի հեշտ է շինարարական գործունեություն ծավալել, ուստի բազմաթիվ փոքր և միջին կառուցապատողներ, կամ ուղղակի կառուցապատողներ, որոնք նախկինում խնդիրներ ունեին թույլտվությունների ստացման հարցում, հիմա շատ հեշտ է այդ ամեն ինչը և նոր խաղացողներ են ի հայտ գալիս»,- նկատեց Ս. Պետրոսյանը: