Հոկտեմբերի 22-ը Վահան Զատիկյանի ծննդյան օրն է. Ըմբշամարտիկ, «Մալաթիա» ջոկատի առաջին հրամանատար, նույնանուն համայնքի  առաջին համայնքապետ, ՀՀ Ազգային ժողովի պատգամավոր Վահան Զատիկյանն այսօր կդառնար 63 տարեկան:

 

 

Այդ առիթը հիշարժան դարձնելու իրենց ավանդույթն ունեն մարզաշխարհի ներկայացուցիչները:

 

Երևանի Ֆիզիկական կուլտուրայի հայկական պետական ինստիտուտում սահմանվել է «Վահան Զատիկյան»  կրթաթոշակ, որին արժանանում են ինստիտուտի լավագույն ուսանողները: Ըմբշամարտիկ, մեծ հայրենասեր Վահան Զատիկյանի պատվին հանրապետության Ազատ ոճի ըմբշամարտի ֆեդերացիան` ամեն տարի, աշնանը հուշամրցաշար է կազմակերպում: Այս տարի, ծննդյան օրվա առիթով «Միկա» մարզահամալիրի մարզադահլիճում կանցկացվի Վահան Զատիկյանի անվան 20-րդ միջազգային հուշամրցաշարը, որին կմասնակցեն Հայաստանի և արտերկրի  մարզական ակումբների պատանի ըմբիշները:

 

Պետական, հասարակական և քաղաքական գործիչ, «Մալաթիա» Երկրապահ կամավորական ջոկատի հիմնադիր հրամանատար, երջանակահիշատակ  Վահան Զատիկյանը ծնվել է 1956թ-ին Ջավախքի Լոմատուրցխ գյուղում, այնուհետև ընտանիքի հետ միասին տեղափոխվել Երևան:

 

Վահան Զատիկյանն ըմբշամարտիկ էր, ըմբշամարտի Հայաստանի ֆեդերացիայի նախագահ: Զինվորագրվելով հայ ժողովրդի ազգային- ազատագրական պայքարին՝ Վահան Զատիկյանը անվերապահորեն հավատում էր հաղթանակին, հավատում էր, որ Հայաստանից նենգորեն խլված Արցախը նորից վերադառնալու է մայր հայրենիքի գիրկը: Մալաթիա-Սեբաստիա համայնքի բնակչությունը, վստահելով իր նվիրյալ զավակին,  անկախության առաջին տարիներին`1991թվականին, նրան ընտրեց համայնքի ղեկավար, ապա՝  ԱԺ պատգամավոր: Արցախյան ազատամարտի հերոս հրամանատարը, զինադադարից հետո ամբողջությամբ նվիրվեց իր համայնքի սոցիալ-տնտեսական խնդիրների կարգավորմանն ու բնակչության կենցաղային վիճակի բարելավմանը՝ մշտապես ուշադրության կենտրոնում պահելով ազատամարտիկներին ու նրանց ընտանիքներին:

 

Վահան Զատիկյանը հաճախ էր իր ելույթներում նշում, որ երկրապահությունը, ազատամարտիկը անգնահատելի հասկացություններ են, արժեք են:

 

Վահան Զատիկյանը մշտապես հիշել և ուշադրության ներքո է պահել զոհված մարտական ընկերների ընտանիքներին, մշտապես ապրել է նրանց հանդեպ պարտքի զգացումով, հաճախ է այցելել Եռաբլուր՝ ընկերների շիրիմներին… Ցավոք, անսպասելի ինքն էլ գնաց` միացավ Եռաբլուրում ննջող իր երկրապահ ընկերներին:

 

Վահան Զատիկյանն ազգանպաստ գործունեության համար արժանացել է կառավարական և գերատեսչական պարգևների, նաև՝ ԵԿՄ բարձրագույն պարգև «Սպարապետ Վազգեն Սարգսյան» շքանշանի ասպետ:

 

Վահան Զատիկյանի անունով է կոչվում իր իսկ ազատագրած Բերձոր քաղաքի թիվ 2 դպրոցը, ուր հաճախ են լինում երկրապահները, օգնում դպրոցին` կահավորման և գրականության հարցում: Զատիկյանի անվան դպրոցի մերձակա հրապարակում՝ Երևան-Ստեփանակերտ մայրուղու մոտ է գտնվում Վահան Զատիկյանի կիսանդրին:

 

Վահան Զատիկյանի ծննդավայրի  դպրոցը նույնպես կրում է նրա անունը: Մալաթիա-Սեբաստիա  համայնքում, վաղամեռիկ համայնքապետի նախաձեռնությամբ  հիմնադրված այգում տեղադրված է նրա կիսանդրին, որը ուխտատեղի է դարձել համայքի բնակչության, երկրապահների ու նոր սերնդի համար:

 

Շնորհավո’ր ծնունդդ, Վահան Զատիկյան, մեր ազնվագույն ընկեր, ազնվագույն հայ:

 

Մի խումբ ընկերներ՝ սիրով, հավատով ու նվիրումով 

Նոյյան տապան  -   Հասարակություն