Ռոհանին հայտարարել է, որ Իրանը ձգտում է միջուկային գործարքի ամրապնդմանը
09-01-2020 17:57:24 | Իրան | Ի՞նչ է գրում մամուլը
tert.am Թեհրանը ձգտում է միջուկային գործարքի ամրապնդմանը, սահմանափակումներին հետևելուց վերջին անգամ հրաժարվելն անհրաժեշտ էր համաձայնագրում հավասարակշռություն հաստատելու համար: Այդ մասին Իրանի նախագահ Հասան Ռոհանին ասել է Եվրախորհրդի նախագահ Շառլ Միշելի հետ ունեցած հեռախոսազրույցի ժամանակ, գրում է «ՌԻԱ Նովոստի» գործակալությունը:
«Իրանն ու Եվրոպան ձգտում են տարածաշրջանում իրավիճակի կայունացմանը և Գործողությունների համատեղ համապարփակ ծրագրի (ԳՀՀԾ) ամրապնդմանը: Մեզ համար շատ կարևոր է, որ Եվրոպան, Չինաստանը և Ռուսաստանն իրենց կարևոր դերն ունենան ԳՀՀԾ-ի պահպանման գործում` ապահովելով Իրանի շահերը», - նշել է Ռոհանին, որի խոսքերը մեջբերված են նրա պաշտոնական կայքում:
Իրանի նախագահի խոսքով` Թեհրանն անցել է միջուկային պարտավորությունների կրճատման վերջին փուլին՝ գործարքում հավասարակշռություն հաստատելու նպատակով:
2020 թվականի հունվարի սկզբին Իրանը հայտարարել էր «միջուկային գործարքի վերջին առանցքային՝ ցենտրիֆուգների քանակի հետ կապված սահմանափակումից հրաժարվելու մասին և նշել, որ այժմ «սահմանափակումներ չեն մնացել»: Միևնույն ժամանակ, Թեհրանը նախկինի պես մտադիր է շարունակել համագործակցել ՄԱԳԱՏԷ-ի հետ և պատժամիջոցների վերացման դեպքում պատրաստ է վերադառնալ իր պարտավորությունների կատարմանը և միջուկային գործարքով նախատեսված Թեհրանի շահերի ապահովմանը:
ՀԱՅԵՐԵՆ
Русский
English
Դաս. հայերեն
French
