Մենք միշտ պետք է պատրաստ լինենք սրացումների, այդ թվում Արցախի հարցում. քաղտեխնոլոգ (ՏԵՍԱՆՅՈՒԹ)
13-01-2020 15:05:47 | Հայաստան | Քաղաքական
Մենք միշտ պետք է պատրաստ լինենք սրացումների, այդ թվում Արցախի հարցում:
Նման կարծիք հունվարի 13-ին լրագրողների հետ հանդիպման ժամանակ հայտնեց քաղտեխնոլոգ Կարեն Քոչարյանը՝ անդրադառնալով տարածաշրջանային զարգացումների ֆոնին Հայաստանի արտաքին քաղաքականությանը:
Ըստ նրա՝ տարեսկզբից արդեն ականատես ենք դառնում, թե ինչպիսի զարգացումներ են լինում տարածաշրջանում:
«Այն հակամարտությունը, որը եղավ Իրանի և ԱՄՆ-ի միջև, ճիշտ է՝ ես երբեք էլ չեմ ասում, որ դա ապոկալիպտիկ էր, բայց մատների արանքով նայել էլ չի կարելի դրան, և ես կարծում եմ՝ դա շարունակություն է ունենալու: Իսկ այդ շարունակությունը նշանակում է, որ դա լինելու է առնվազն մեր կողքերը, ինչը նորություն չի»,- նկատեց քաղտեխնոլոգը՝ հավելելով, որ պրոցեսներն այնքան արագ են զարգանում, որ Հայաստանի արտգործնախարարությունը պետք է պատրաստ լինի հնարավոր սրացումներին:
Արցախում սպասվող ընտրությունների և դրանից բխող զարգացումների հետ կապված էլ Կ. Քոչարյանը կոչ արեց լրագրողներին և քաղաքական փորձագետներին հնարավորինս զուսպ մեկնաբանել այնտեղ ընթացող գործընթացները:
Նա նկատեց, որ հասարակական կարծիքի ձևավորման վրա այսօր լուրջ ազդեցություն ունի ֆեյսբուք սոցիալական հարթակը, որտեղ կարծիք են արտահայտում մարդիկ, որոնք կարող են լրջորեն վտանգել Հայաստանի ազգային անվտանգությունը:
Քաղտեխնոլոգի խոսքերով՝ դրա ականատեսը եղանք հունվարի սկզբին, երբ ֆեյսբուքյան ինչ-որ օգտատեր գրեց, թե Նիկոլ Փաշինյանը շնորհավորել է Թրամփին, և այդ լուրն արագությամբ հասավ ոչ միայն Ադրբեջան, այլև Իրան:
Նրա դիտարկմամբ՝ հաջորդ անգամ նման իրավիճակներից խուսափելու համար առաջին հերթին պատասխանատուները պետք է ոչ միայն շատ զգոն լինեն, այլև նախահարձակ. «Անմիջական պատասխանատուները չպետք է թողնեին, որ նման բան լիներ, ավելին՝ պետք է նախահարձակ լինեին, որ Իրան հասներ ոչ թե այն, որ Փաշինյանն է շնորհավորել Թրամփին, այլ՝ Ալիևը, առավել ևս, որ դրա հիմքերն ավելի շատ կային»,- ընդգծեց Կ. Քոչարյանը:
Նրա համոզմամբ՝ պետական կառույցները պատշաճ կերպով չեն աշխատում հասարակության և լրատվամիջոցների հետ, և այստեղ խնդիրը բոլորովին էլ թափանցիկ գործելաոճի մեջ չէ:
ՀԱՅԵՐԵՆ
Русский
English
Դաս. հայերեն
French
