Հույս ունեմ, որ այդ ուժի կազմում գտնվող ողջամիտ հատվածն իր մեջ ուժ կգտնի գնահատական տալու տեղի ունեցածին. Արման Բաբաջանյան
21-01-2020 14:43:02 | Հայաստան | Հասարակություն
Ես հույս ունեմ, որ այդ ուժի կազմում գտնվող ողջամիտ հատվածն իր մեջ ուժ կգտնի գնահատական տալու տեղի ունեցածին:
Այս մասին լրագրողների հետ ճեպազրույցում հայտարարեց Ազգային ժողովի անկախ պատգամավոր Արման Բաբաջանյանը՝ անդրադառնալով իր և «Բարգավաճ Հայաստան» խմբակցության պատգամավորների միջև հունվարի 21-ին տեղի ունեցած քաշքշուկին:
Հիշեցնենք, որ այսօր քրեական ենթամշակույթի դեմ պայքարի վերաբերյալ օրենքի նախագծի քննարկման ժամանակ ԲՀԿ-ական Գևորգ Պետրոսյանը կառավարությանը խորհուրդ տվեց պայքարել նաև «գողական» բառի հետ կապված 3 տառից բաղկացած հասկացության դեմ, որին ի պատասխան՝ անկախ պատգամավոր Արման Բաբաջանյանը հորդորեց խմբակցության անդամներին ներողություն խնդրել իրենց գործընկերոջ ելույթի համար, իսկ ԱԺ նախագահին խնդրեց համապատասխան քայլեր ձեռնարկել պատգամավորի նկատմամբ:
Արման Բաբաջանյանի ելույթից հետո լեզվակռիվ և քաշքշուկ տեղի ունեցավ պատգամավորների միջև, իսկ ԱԺ նախագահը ստիպված եղավ կարգապահական միջոցներ ձեռնարկել ԲՀԿ-ական պատգամավորների նկատմամբ:
Ըստ Ա. Բաբաջանյանի՝ Գևորգ Պետրոսյանի ելույթի վերջնամասը լսելուց հետո նիստերի դահլիճում գտնվող յուրաքանչյուր իրեն հարգող պատգամավոր, ով պատվիրակված է խորհրդարանում ներկայացնելու պետության շահը, առնվազն պետք է անարձագանք չթողներ այդ ելույթը և դրա բովանդակային մասը:
«Հեռու եմ այն մտքից, որ Գևորգ Պետրոսյանը կարող էր կոնկրետ անձի նկատի ունենալ, իմ վերաբերմունքն էլ առհասարակ երևույթին է ուղղված և այն մտայնությանը, որը գերակշռող է «Բարգավաճ Հայաստան»-ում: Բայց ես հույս ունեմ, որ այդ աշխարհընկալումը, այդ աշխարհայացքը, այնուամենայնիվ, դոմինանտ չէ»,- ընդգծեց անկախ պատգամավորը:
Նրա փոխանցմամբ՝ իր տեղը զբաղեցնելիս ԲՀԿ-ական պատգամավորը բարձր տոնով է խոսել իր հետ, ինքն էլ համարժեք պատասխան է տվել նույն տոնայնության մեջ.
«Որևէ մեկի մտքով չանցնի, որ ես՝ լինելով անկախ պատգամավոր որևէ ձևով, որևէ պարագային կաշկանդված կլինեմ ասելու այն, ինչ մտածում եմ, և պնդելու ու հետապնդելու Հայաստանի քաղաքացու, պետության շահը: Այնպես որ, եթե ԲՀԿ-ին թվում է, որ ես այստեղ մենակ եմ և կաշկանդված եմ լինելու և չեմ ասելու իմ ասելիքը և չեմ կարողանալու պաշտպանել այն դահլիճում և դահլիճից դուրս, նրանք չարաչար սխալվում են»:
ՀԱՅԵՐԵՆ
Русский
English
Դաս. հայերեն
French
