Հայաստանի և Սերբիայի միջև կգործի առանց մուտքի վիզային ռեժիմ
30-01-2020 12:33:01 | Հայաստան | Հասարակություն
ՀՀ կառավարությունը հունվարի 30-ին կայացած նիստում ընդունեց որոշում Սերբիայի հանրապետության քաղաքացիների համար առանց մուտքի վիզայի այցելությունների ռեժիմ սահմանելու մասին:
Համապատասխան զեկույցով հանդես եկավ ՀՀ արտաքին գործերի նախարարի տեղակալ Ավետ Ադոնցը՝ տեղեկացնելով, որ 2019 թվականի հոկտեմբերի 25-ին Սերբիայի կառավարությունը որոշում է ընդունել վերացնել մուտքի արտոնագրի միակողմանի պահանջը սովորական անձնագիր կրող ՀՀ քաղաքացիների համար:
Ըստ նրա՝ նշյալ որոշումն ուժի մեջ է մտել 2019 թվականի նոյեմբերի 2-ին:
«Դրա արդյունքում ՀՀ քաղաքացիները կարող են Սերբիայի հանրապետության տարածքում առանց մուտքի արտոնագրի պահանջի մնալ առավելագույնը 90 օր ժամկետով 180 օրվա համար: Պահպանելով փոխադարձության սկզբունքը՝ մշակվել է սույն որոշման նախագիծը, որի ընդունման արդյունքում Սերբիայի քաղաքացիները համաձայն «Օտարերկրացիների մասին» օրենքի՜ առանց մուտքի վիզայի ՀՀ տարածքում կարող են գտնվել առավելագույնը 180 օր ժամկետով մեկ տարվա ընթացքում»,- ընդգծեց Ա. Ադոնցը:
Նրա խոսքերով՝ Հայաստանի և Սերբիայի միջև վիզաների ազատակացումը ևս մեկ քայլ է ՀՀ քաղաքացիների ազատ տեղաշարժի իրավունքի ապահովման բնագավառում:
Վարչապետ Նիկոլ Փաշինյանի գնահատմամբ՝ ներկայացված որոշման նախագիծը կարևոր է և կարող է խթանել Հայաստանի և Սերբիայի միջև ուղիղ չվերթների իրականացմանը:
«Ընդհանրապես այդ միտումը՝ տարբեր երկրների հետ վերացնել վիզային ռեժիմը, կարծում եմ՝ շատ կարևոր ուղղություն է մեր արտաքին քաղաքականության համար»,- նկատեց վարչապետը՝ հետաքրքրվելով, թե այսօր Հայաստանը քանի՞ երկրի հետ ունի ազատականացված վիզային ռեժիմ:
Ի պատասխան՝ Ա. Ադոնցը նշեց, որ այս պահին 60-ից ավելի երկրի հետ ունենք առանց մուտքի վիզային ռեժիմ:
Ն. Փաշինյանի խոսքերով՝ դա կարևոր ինֆորմացիա է, որի մասին պետք է անպայման իրազեկել քաղաքացիներին: