Սահմանադրական բարեփոխումների համար նախատեսված հանձնաժողովն իրականում դեռ չի  ձևավորվել, իսկ այդ հանձնաժողովում Արդարադատության նախկին նախարար Արփինե Հովհաննիսյանին չներգրավելը քաղաքական որոշում է: 

 

Այս մասին հունվարի 30-ին կայացած կառավարության նիստից հետո լրագրողների հետ ճեպազրույցում նշեց Արդարադատության նախարար Ռուստամ Բադասյանը: 

 

Ըստ նրա՝ նշյալ հանձնաժողովի կազմում պետք է ընդգրկված լինեն 6 իրավաբան-գիտնականներ և քաղաքացիական հասարակության երկու ներկայացուցիչներ: 

 

«Տիկին Հովհաննիսյանի մասով գնահատում ենք իր անկեղծ մղումները, որ ինքը հայտարարել է, որ ես անկեղծ մղումներով ուզում էի օգնել: Մենք իրականում այս քայլով չենք ուզում ցույց տալ, որ մենք իր օգնության կարիքը չունենք կամ ունենք, դրա մասին չէ խոսքը։ Ուղղակի տիկին Հովհաննիսյանի դիմումում նշված է, որ ինքը մասնակցել է նախորդ սահմանադրական բարեփոխությունների հանձնաժողովի աշխատանքներին։ Իրականում կարծես թե խոսքը գնում է ոչ ֆորմալ մասնակցության մասին, որովհետև մենք նայել ենք, այնտեղ նա ֆորմալ առումով հանձնաժողովի անդամ չի եղել, բայց մենք կասկածի տակ նույնիսկ դա էլ չենք դնում: Այլ խնդիրը հետևյալն է՝ մեր պաշտոնական փաստաթղթում դատաիրավական բարեփոխումների ռազմավարությամբ նշվում է, որ քննադատություն է հնչում 2015 թվականի սահմանադրական բարեփոխումների և դրան հաջորդած պրոցեսների հետ կապված: Եվ, բնականաբար, մենք այդ հանգամանքը չէինք կարող դրական առումով գնահատել»,- պարզաբանեց Ռ. Բադասյանը: 

 

Վերջինիս խոսքերով՝ իրենք Ա. Հովհաննիսյանի օգնությունից չեն հրաժարվի, քանի որ սա ոչ առաջին, ոչ էլ վերջին ֆորմատը չէ: 

 

Անդրադառնալով 2015 թվականի Սահմանադրական փոփոխությունների նախաձեռնությանը և իրականացմանը՝ նախարարը կրկին պնդեց, որ այն խայտառակություն է եղել Հայաստանի համար: 

 

Ռ. Բադասյանը հորդորեց լրագրողներին հիշել նախորդ հանձնաժողովի կազմը և համեմատել ներկայիս կառավարության կողմից ընտրված նոր անդամներին. «Անկախ մարդիկ են բոլորը, որոնց այս փուլում թիրախավորելը բացարձակ տեղին չէ: Իրենց հնարավորություն է պետք տալ որպես անկախ փորձագետներ՝ մասնակցել այդ աշխատանքներին և իրենց կարծիքները մեր նախանշած հարցերում արտահայտել»,- ընդգծեց Արդարադատության նախարարը: 

 

 

 

 

 

 

 

 

 

Մանրամասները՝ տեսանյութում

Էլիզա Զախարյան, «Նոյյան Տապան» 

Նոյյան տապան  -   Հասարակություն