Ալեքսան Պետրոսյանի ազատ արձակման որոշման դեմ Դատախազության բողոքը մերժվել է
27-02-2020 16:48:35 | Հայաստան | Ի՞նչ է գրում մամուլը
ԱԺ նախկին պատգամավոր, «ՄԱՊ»-ի Ալիկ անունով հայտնի Ալեքսան Պետրոսյանի ազատ արձակման որոշման դեմ Դատախազության բողոքը մերժվել է:
Այս որոշումը կայացրել է Վերաքննիչ քրեական դատարանի դատավոր Ռուզաննա Բարսեղյանը:
ՀԺ-ի հետ զրույցում Պետրոսյանի պաշտպան Միհրան Պողոսյանը տեղեկացրեց, որ միաժամանակ մերժվել է իր կողմից ներկայացված բողոքը՝ հիմնավոր կասկածի առկայության, ինչպես նաեւ խափանման միջոցի հիմքերի դեմ:
Ալեքսան Պետրոսյանը 30 միլիոն դրամ գրավի դիմաց ազատ էր արձակվել հունվարի 10-ին: Որոշումը կայացրել էր Երեւանի ընդհանուր իրավասության դատարանի դատավոր Վարդան Գրիգորյանը՝ բավարարելով պաշտպանական կողմի միջնորդությունը: Դատարանի այդ որոշումն էլ Դատախազությունը բողոքարկել էր Վերաքննիչ դատարան:
Ալեքսան Պետրոսյանը մեղադրվում է 38-190-րդ հոդվածի 3-րդ մասի 1-ին կետով՝ փողերի լվացմանն օժանդակելու համար: Այս քրեական գործով անցնում է նաեւ նրա որդին՝ Մակար Պետրոսյանը, ում մասով դեռ նախաքննության ավարտ չի հայտարարվել: Ըստ մեղադրանքի՝ հայր եւ որդի Պետրոսյաններն օժանդակել են բնապահպանության նախկին նախարար, հետախուզման մեջ գտնվող Արամ Հարությունյանին:
ՀԱՅԵՐԵՆ
Русский
English
Դաս. հայերեն
French
