Արտերկրում խաղաղապահ առաքելություն իրականացնող հայ զինծառայողների առողջական վիճակի հետ կապված մտահոգվելու առիթ չկա. Բրիգադի հրամանատար (ՏԵՍԱՆՅՈՒԹ)
28-03-2020 17:01:59 | Հայաստան | Հասարակություն
Աշխարհում կորոնավիրուսի սրընթաց տարածման պայմաններում Աղֆանստանում, Լիբանանում և Կոսովոյում խաղաղապահ առաքելություն իրականացնող հայ զինծառայողների առողջական վիճակի հետ կապված մտահոգվելու առիթ չկա:
Ինչպես ֆեյսբուքի իր էջի ուղիղ եթերում հայտնեց ՀՀ պաշտպանության նախարարության մամուլի խոսնակ Շուշան Ստեփանյանը, իրենք պարբերաբար հարցեր և մտահոգություններ են ստանում առ այն, թե ինչպիսի՞ն է ՀՀ ԶՈՒ խաղաղապահ առաքելություն իրականացնող զինծառայողների առողջական վիճակը, ինչպիսի՞ կանխարգելիչ միջոցառումներ են իրականացվում զորախմբերի կազմում:
Նշյալ հարցերի պատասխանն ստանալու համար ՊՆ մամուլի խոսնակը ուղիղ եթերում դիմեց Խաղաղապահ բրիգադի հրամանատար, գնդապետ Արտակ Տոնոյանին, ում միջոցով նաև տեսակապ հաստատվեց արտերկրում խաղաղապահ առաքելություն իրականացնող զորախմբերի ներկայացուցիչների հետ:
Ա. Տոնոյանը տեղեկացրեց, որ իրենք մշտական կապի մեջ են զորախմբերի հետ, հետևում և վերահսկում են նրանց կողմից կորոնավիրուսի տարածումը կանխարգելող միջոցառումների իրականացմանը:
Բրիգադի հրամանատարն առաջինը տեսակապ հաստատեց Աղֆանստանում խաղաղապահ առաքելություն իրականացնող զորախմբի հրամանատար, փոխգնդապետ Կարեն Թադևոսյանի հետ:
Վերջինս տեղեկացրեց, որ զորախումբն իր ծառայությունն իրականացնում է բնականոն հունով, իսկ կորոնավիրուսի հետ կապված որևէ մտահոգիչ խնդիր ու խոչընդոտ չունեն:
«Իրականացված կանխարգելիչ միջոցառումները հետևյալն են. կրճատվել է քաղաքացիական բնակչության ելքը և մուտքը մեր ռազմաբազա, իսկ զինծառայողներին բաժանվել են սպիրտային լուծույթներով փոքրիկ տարաներ, որոնք զինծառայողները պահում են իրենց գրպանում, և բաժանվել են մի փոքր ավելի մեծ տարաներ, որոնք տեղադրված են գրասենյակներում, միջանցքներում, ժամանցի և այլ նշանակության սենյակներում, որպեսզի զինծառայողները հաճախակի ախտահանեն իրենց ձեռքերը: Իսկ զինծառայողների ստուգման հետ կապված զորախմբում ունենք բժշկուհի, որը շատ հետևողականորեն հետևում է զինծառայողների առողջական վիճակին»,- ընդգծեց Կ. Թադևոսյանը:
Ըստ էության նույն տեղեկատվությունը տրամադրեցին նաև Կոսվոյում և Լիբանանում խաղաղապահ առաքելություն իրականացնող զորախմբերի ներկայացուցիչները:
Հիշեցնենք, որ ՀՀ զինված ուժերի խաղաղապահ բրիգադն իրականացնում է միջազգային խաղաղարար առաքելություններ՝ ՄԱԿ-ի հովանու ներքո Լիբանանում և ՆԱՏՕ-ի՝ «Համագործակցություն հանուն խաղաղության» ծրագրով Կոսովոյում և Աֆղանստանում: