Բակո Սահակյանը պատասխանել է Ապրիլյան պատերազմի քննիչ հանձնաժողովի հարցերին. հանձնաժողովի աշխատանքի ժամկետը սպառվեց.ՀԺ
04-06-2020 15:08:17 | Հայաստան | Ի՞նչ է գրում մամուլը
Ապրիլյան պատերազմի հանգամանքներն ուսումնասիրող Ազգային ժողովի քննիչ հանձնաժողովը երեկ հեռավար զրույց է ունեցել Արցախի նախկին նախագահ Բակո Սահակյանի հետ: 2016-ի Ապրիլյան պատերազմի ժամանակ նա գործող նախագահն էր:
Հանձնաժողովի անդամ Քրիստինե Պողոսյանը ՀԺ-ին հայտնեց, որ Բակո Սահակյանին 8 հարց են ուղղել, ստացել բոլոր հարցերի պատասխանները:
«Հրապարակման ենթակա տեղեկատվություն այդ զրույցից չկա, կարեւորը՝ Բակո Սահակյանը պատասխանել է մեր բոլոր հարցերին, եւ մենք կարող ենք ավարտած համարել մեր աշխատանքը եւ անցնել զեկույցի պատրաստմանը»,- տեղեկացրեց Պողոսյանը:
Մեր հարցին, թե մինչեւ ե՞րբ են նախատեսում զեկույցը պատրաստել, պատգամավորը պատասխանեց, որ կոնկրետ ժամկետ չեն նախանշել, կփորձեն դա անել մինչեւ արձակուրդ գնալը, իսկ եթե չհասցնեն, կավարտեն սեպտեմբերին:
Հիշեցնենք, որ 2019 թվականի մայիսի 31-ին Ազգային ժողովը քվեարկությամբ որոշում կայացրեց ստեղծել 2016 թվականի ապրիլին ծավալված ռազմական գործողությունների հանգամանքների ուսումնասիրման քննիչ հանձնաժողով: Թեեւ այն ստեղծվեց 6 ամիս ժամկետով, սակայն դեկտեմբերի 10-ին նույն Ազգային ժողովը որոշեց եւս 6 ամսով՝ մինչեւ 2020 թվականի հունիսի 4-ը երկարացնել հանձնաժողովի աշխատանքի ժամկետը:
Հանձնաժողովն այս ընթացքում ունեցել է մի քանի տասնյակ հյուրեր, ուսումնասիրել հազարավոր էջերով գաղտնի փաստաթղթեր: Միակ հրավիրյալը, որ հրաժարվել է մասնակցել հանձնաժողովի նիստին, եղել է 2016-ի ապրիլին Զինված ուժերի ԳՇ պետի պաշտոնը զբաղեցրած Յուրի Խաչատուրովը:
ՀԱՅԵՐԵՆ
Русский
English
Դաս. հայերեն
French
