Ռուբեն Հայրապետյանը 2003-ից ՌԴ քաղաքացի է. ՀՀ գլխավոր դատախազություն
04-08-2020 16:13:48 | Հայաստան | Մամլո հաղորդագրություն
«Թեև ՌԴ գլխավոր դատախազությունից դեռևս չենք ստացել Ռուբեն Հայրապետյանի նկատմամբ միջպետական հետախուզումը ՌԴ տարածքում դադարեցնելու և դրա հնարավոր հիմքերի մասին հարցման պատասխանը, սակայն վարույթն իրականացնող մարմնի կողմից քրեական գործի շրջանակներում ձեռք են բերվել տվյալներ, որոնք փաստում են, որ Ռ. Հայրապետյանը 2003 թ. հունիսի 20-ից հանդիսանում է ՌԴ քաղաքացի»,- 1lurer.am-ի հարցին ի պատասխան տեղեկացրեց ՀՀ գլխավոր դատախազի խորհրդական Գոռ Աբրահամյանը:
Հիշեցնենք՝ օրերս Ռուսաստանը դադարեցրել է ՀՀԿ-ական նախկին պատգամավոր Ռուբեն Հայրապետյանի հետախուզումը իր տարածքում։ ՀՀ գլխավոր դատախազությունը հետախուզման դադարեցման պատճառներն իմանալու համար դիմել էր ՌԴ իրավապահներին։
ԱԺ ՀՀԿ խմբակցության նախկին պատգամավոր Ռուբեն Հայրապետյանը մեղադրվում է 2 քրեական գործով` քաղաքացուն ֆիզիկական ուժեղ ցավ կամ հոգեկան ուժեղ տառապանք պատճառելու, ազատությունից ապօրինի զրկելու, ինչպես նաև ինքնիրավչության համար. այս քրեական գործով մեղադրյալի կարգավիճակ ունի նաև Հայրապետյանի որդին:
Երկրորդ գործով նա մեղադրվում է ծանր հետևանքներ առաջացնելով՝ պաշտոնեական լիազորությունները չարաշահելուն դրդելու և ծանր հետևանքներ առաջացնելով՝ որպես կազմակերպության ծառայող կարգադրիչ լիազորությունները չարաշահելու համար: Այս գործով էլ որպես մեղադրյալ ներգրավված են Երևանի նախկին փոխքաղաքապետ Վահե Նիկոյանն ու քաղաքապետարանին ենթակա ընկերության ներկայացուցիչ Գևորգ Հակոբյանը:
ՀԱՅԵՐԵՆ
Русский
English
Դաս. հայերեն
French
