Լիբանանի մայրաքաղաք Բեյրութում տեղի ունեցած պայթյունի պատճառով Անթիլիասի կաթողիկոսարանը մեծ վնասներ է կրել։

 

Այս մասին հայտնում է Cilicia TV-ն:

 

Օգոստոսի 4-ին Բեյրութի նավահանգստում տեղի ունեցած պայթյունի պատճառով Անթիլիասի Մայրավանքը ևս կրել է նյութական մեծ վնասներ։ Վնասվել են Մայր տաճարի,  Վեհարանի, հայագիտական ու մանկավարժական կենտրոնների և Կիլիկիա թանգարանի դռները, ջահերը, պատուհանները։

 

Օգոստոսի 4-ին հզոր պայթյունը ցնցել է Լիբանանի մայրաքաղաք Բեյրութը: Ականատեսները տեսանկարահանել են կատարվածն ու ներկայացրել ավերածությունները, որոնք տեղի են ունեցել շրջակայքում: Առաջին պայթյունը որոտացել է քաղաքային նավահանգստում, տեղական ժամանակով երեկոյան 18:00-ից հետո: Րոպեներ անց, ըստ որոշ հրապարակումների, ավելի մեծ պայթյուն է որոտացել: Տեսանկարահանումը ֆիքսել է հարվածային ալիքը, որը ցնցել է մի քանի կիլոմետր հեռավորությամբ գտնվող շինությունները: Լիբանանի առողջապահության նախարարությունը բոլոր հիվանդանոցներին հրահանգել էր պատրաստվել վիրավորների ընդունմանը, իսկ երկրի Առողջապահության նախարարը հեռուստատեսությամբ հայտնել է, որ վիրավորների թիվը շատ մեծ է:  Առողջապահության նախարար Համադ Հասանը տեղական ԶԼՄ-ներին հայտնել էր, որ նավահանգստում հրավառության պարագաներ տեղափոխող նավ է պայթել: Լիբանանի նախագահն Անվտանգության խորհրդի արտահերթ նիստ է հրավիրել։ Երկրում օգոստոսի 5-ը սգո օր է հայտարարվել։ Վերջին տվյալների համաձայն՝ Բեյրութում տեղի ունեցած պայթյունի հետևանքով զոհերի թիվը գերազանցել է 100-ը, վիրավորվել է ավելի քան 4 հազար մարդ:

Նոյյան տապան  -   Ի՞նչ է գրում մամուլը