Հարված ահաբեկիչներին Սիրիայում. Իրանի ու Ռուսաստանի ժամանակը
15-10-2020 11:19:28 | Հայաստան | Վերլուծություն
ՌԻԱ Նովոստին, հղում անելով Սիրիայում պատերազմող կողմերի հաշտեցման կենտրոնի ղեկավար Ալեքսանդր Գրինկեւիչին, հայտնում է, որ Սիրիայում՝ Իդլիբից 13 կմ հյուսիս պայթեցվել է ահաբեկիչների զինամթերքի եւ քլորի խոշոր պահեստ, որը նախատեսված էր ահաբեկչական սադրանքներ կազմակերպելու համար: Տեղեկությունը հրապարակվել է նախօրեին ուշ երեկոյան:
Հոկտեմբերի 14-ի երեկոյան տեղեկություն եղավ, որ Թուրքիայի նախագահ Էրդողանը զանգահարել է ՌԴ նախագահ Պուտինին: Քննարկել են Արցախում իրավիճակը, նաեւ իրավիճակը Սիրիայում եւ Լիբիայում: Ըստ Կրեմլի հաղորդագրության, Պուտինը կարեւոր է համարել այդ ուղղություններում Թուրքիայի եւ Ռուսաստանի միջեւ ձեւավորված արդյունավետ դիվանագիտական «գիծը»:
Միաժամանակ, Պուտինը խիստ մտահոգություն է հայտնել Կովկաս ահաբեկիչներ տեղափոխելու առնչությամբ: Դրանք, ինչպես հայտնի է, Թուրքիան նետել է Արցախի դեմ գրոհի: ՌԴ այդ տեղեկության հավաստիությունը օրեր առաջ արձանագրվել է արտաքին հեռախուզական ծառայության զեկույցում: Հատկանշական է, որ այդ ծառայության ղեկավար Նարիշկինի հայտարարությունից գրեթե անմիջապես հետո ռուսական ուժային կառույցներին մոտ Տելեգրամ ալիքներից մեկով տարածվեց տեղեկություն, որ ՌԴ ռազմա-տիեզերական ուժերը հարվածներ են հասցնելու Սիրիայում ահաբեկչական այն բազաներին, որտեղ պատրաստվում են Կովկաս բերվող ահաբեկիչները:
Եղել է այդպիսի հարված, թե ոչ, պաշտոնական տեղեկություն կարծես թե չի տարածվել: Սակայն հատկանշական է նախօրեին տարածված տեղեկությունը, փաստացի պաշտոնական հաղումով, որ պայթեցվել է ահաբեկիչների խոշոր զինապահեստ: Սպանվել է նաեւ 4 ահաբեկիչ, ըստ տեղեկության:
Միեւնույն ժամանակ, դրա նախօրեին՝ հոկտեմբերի 12-ին տարածվեց տեղեկությունը Չեչնիայից, որտեղ իրականացվել էր հակաահաբեկչական գործողություն, եւ վնասազերվել էին չորս ահաբեկիչներ: Այդ օպերացիայի ընթացքում զոհվել էին նաեւ երկու ռոսգվարդիական: Ռամզան Կադիրովը հայտարարել էր, որ ահաբեկիչները Չեչնիա էին եկել Սիրիայից՝ ահաբեկչական ակտեր կազմակերպելու համար: Դրան էլ նախորդել էր միջադեպ Դաղստանում, որտեղ երկու ահաբեկիչ սպանվել էին ոստիկանների ուղղությամբ կրակ բացելուց հետո:
Սիրիայում ահաբեկիչների բազայի պայթյունը Մոսկվայի պատասխա՞նն է, եթե իհարկե այն ժամանակագրային հաջորդությամբ հաջորդում է, ոչ թե նախորդում Գրոզնիի եւ Դաղստանի դեպքերին: Պուտինին Էրդողանի զանգի անհրաժեշտությունը թելադրած գործոնների շարքում կա՞ նաեւ այդ հանգամանքը:
Մյուս կողմից, Ռուսաստանը մտահոգություն է հայտնում ահաբեկիչների տեղափոխման փաստի հանգամանքով, այժմ նաեւ ՌԴ նախագահի մակարդակով: Իսկ ե՞րբ կհնչի Թուրքիային ուղղված պահանջը՝ հեռացնել ահաբեկիչներին Կովկասից:
Թե՞ Մոսկվան, եւ Աստանայի ձեւաչափի Թուրքիայի մյուս գործընկեր Իրանը Անկարայի առաջ չեն դնի այդպիսի պահանջ՝ առեւտրի առիթ չտալու համար, այլ ձեռնամուխ կլինեն ահաբեկիչների ոչնչացման գործին, որն այժմ իրականացնում է միայն հայկական բանակը:
ՀԱՅԵՐԵՆ
Русский
English
Դաս. հայերեն
French
