Կրոնական քարոզիչը կոչ է արել իրեն ուղարկել զինծառայողների մասին տվյալներ. ԱԱԾ-ն կրկին զգուշացնում է
30-10-2020 13:35:41 | Հայաստան | Իրավունք
ՀՀ ազգային անվտանգության ծառայությունը տեղեկացնում է, որ ֆեյսբուքյան օգտատեր Վահե Պետրոսյանը, որը ներկայանում է՝ որպես կրոնական քարոզիչ, իր ուղիղ եթերներից մեկում խնդրել է իրեն ուղարկել առաջնագծում գտնվող զինվորների վերաբերյալ «վկայություններ», թե ինչպես են վերջիններս փրկվել Աստծո շնորհիվ: ԱԱԾ-ն կոչ է անում ոչ մի դեպքում չփոխանցել զինծառայողների, թիկունքի, զորքերի տեղաշարժի մասին տվյալներ:
ԱԱԾ հաղորդագրությունը ներկայացնում ենք ստորեւ.
Սոցիալական ցանցերի հայազգի տարբեր օգտատերեր պարբերաբար տարածում են հայտարարություններ՝ խնդրելով իրենց տրամադրել տեղեկատվություն արցախա-ադրբեջանական զորքերի շփման գծի, Արցախի Հանրապետությունում ընթացող ռազմական գործողությունների, մարտի դաշտում տեղի ունեցող հերոսությունների և բացառիկ սխրանքների մասին:
Մասնավորապես՝ www.facebook.com սոցիալական ցանցի օգտատեր Վահե Պետրոսյանը, որը ներկայանում է՝ որպես կրոնական քարոզիչ, իր ուղիղ եթերներից մեկում խնդրել է իրեն ուղարկել առաջնագծում գտնվող զինվորների վերաբերյալ «վկայություններ», թե ինչպես են վերջիններս փրկվել Աստծո շնորհիվ:
Եվս մեկ անգամ հիշեցնում ենք, որ պատերազմական իրավիճակում առաջնագծի, թիկունքի, զորքերի տեղաշարժի, մարդկանց կուտակումների վերաբերյալ, ինչպես նաև առաջին հայացքից թեկուզ ոչ նշանակալի թվացող ցանկացած տեղեկատվություն անթույլատրելի է փոխանցել այլ անձանց, քանի որ նման տվյալները ուղղակի կամ անուղղակի կերպով կարող են օգտագործվել Հայաստանի Հանրապետության և Արցախի Հանրապետության անվտանգությանը վնասող գործողություններ իրականացնելու համար:
Ազգաբնակչությանը կրկին հորդորում ենք սոցիալական ցանցերում շփումների ընթացքում դրսևորել զգոնություն, աչալրջություն և զերծ մնալ առաջնագծին առնչվող տվյալներ տարածելուց: