2021 թվականին Ucom ընկերությունն իր բաժանորդներին խոստանում է 4G ցանցի և ֆիքսված կապի ավելի արագ և կայուն ծառայություն (ՏԵՍԱՆՅՈՒԹ)
23-12-2020 16:56:58 | Հայաստան | Գիտություն եւ տեխնոլոգիաներ
2021 թվականին Ucom ընկերությունն իր բաժանորդներին խոստանում է 4G ցանցի և ֆիքսված կապի ավելի արագ և կայուն ծառայություն:
Այս մասին դեկտեմբերի 23-ին լրագրողների հետ հանդիպման ժամանակ տեղեկացրեց Ucom-ի գլխավոր տնօրեն Արա Խաչատրյանը:
Ըստ նրա՝ 2021 թվականին նախատեսում են նաև արդիականացնել շարժական ցանցը, ինչը նշանակում է, որ հաջորդ տարվա ավարտին ընկերությունը պատրաստ կլինի 5G-ի գործարկմանը:
«Կան նաև հստակ պրոդուկտներ, որոնք ցանկանում ենք ինտեգրել մեր բաժանորդների համար, այսինքն՝ բերել այլ ծառայություններ, որոնց մասին այս պահին չէի ուզենա փակագծերը բացել»,- նշեց Ա. Խաչատրյանը:
Վերջինս խոսքերով՝ առայժմ քննարկումների մակարդակով ընկերությունն ունի հետաքրքրվածություն մուտք գործել Արցախ, որտեղ պատերազմի ընթացքում ընկերությունը կապի օպերատորն անջատել էր ռոումինգը:
Ամփոփելով անցնող տարին Ucom-ի գլխավոր տնօրենը նկատեց, որ COVID-19-ով պայմանավորված 2020 թվականը բարդ է եղել թե համաշխարհային, թե հայաստանյան տնտեսվարողների համար:
Մասնավորապես, 2020 թվականի ապրիլից ընկերության ներսում առաջացել է ճգնաժամային իրավիճակ, որը պատվով հաղթահարել են աշխատակիցների, բաժանորդների և գործընկերների աջակցությամբ:
«Ucom-ը որպես սոցիալապես պատասխանատու ընկերություն՝ այդ ընթացքում չի մոռացել իր սոցիալական պատասխանատվության մասին: Բազմաթիվ՝ մոտ ավելի քան 30 ծրագրեր ենք իրականացրել թե կրթության, թե պաշտպանության, թե բիզնեսի ոլորտում: Համագործակցել ենք «Սեյվ դը չիլդրեն», «ՍՕՍ մանկական գյուղեր» հայկական բարեգործական հիմնադրամի, «Հույսի կամուրջ» ՀԿ-ի հետ՝ տրամադրելով կապի ծառայություններ և գաջեթներ»,- մանրամասնեց Ա. Խաչատրյանը: