Հայտնի է` ինչ են քննարկելու Փաշինյանն ու Էրդողանը Պրահայում հանդիպման ժամանակ
04-10-2022 10:50:09 | Հայաստան | Ի՞նչ է գրում մամուլը
Sputnik. Ավելի վաղ Թուրքիայի ղեկավարն իր ելույթում հայտարարել էր նման հանդիպման հնարավորության մասին։
Հայաստանի Հանրապետության վարչապետ Նիկոլ Փաշինյանն ու Թուրքիայի նախագահ Ռեջեփ Թայիփ Էրդողանը հոկտեմբերի 6-ին Պրահայում կհանդիպեն եվրոպական քաղաքական հանրության գագաթնաժողովի շրջանակում։ Այս մասին հայտնում է «Սաբահ» թերթը` վկայակոչելով իր աղբյուրները։
Թուրք ղեկավարը հոկտեմբերի 1-ի իր ելույթում հայտարարել էր նման հանդիպման հնարավորության մասին։
«Սաբահը» նշում է, որ բանակցություններում նախատեսվում է քննարկել Հայաստանի և Թուրքիայի միջև հարաբերությունների կարգավորումը։ Մասնավորապես Էրդողանը պատրաստվում է Փաշինյանին առաջարկել երկկողմ հարաբերությունների կարգավորման հարցերով հատուկ ներկայացուցիչների հանդիպումները հաջորդաբար անցկացնել Թուրքիայում և Հայաստանում, այլ ոչ թե երրորդ երկրների տարածքում։
Բացի դրանից, Թուրքիայի նախագահը հանդես կգա տարածաշրջանում լարվածության թուլացման և Հայաստանի ու Ադրբեջանի միջև խաղաղության պայմանագրի արագ ստորագրման առաջարկներով։
Նշենք, որ հայկական կողմը ոչ հերքել, ոչ էլ հաստատել է այս հանդիպման մասին լուրը։
Չնայած Հայաստանի ու Թուրքիայի միջև ընդհանուր սահմանին, դիվանագիտական հարաբերություններ չկան։ 2009 թվականին Ցյուրիխում երկու երկրի ԱԳ նախարարները ստորագրել են դրանք հաստատելու մասին արձանագրություններ, սակայն այդ փաստաթղթերը կողմերը չէին վավերացրել։ 2018 թվականի մարտի 1-ին Հայաստանը հայտարարել է արձանագրությունների չեղարկման մասին։
Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորման հստակ քայլեր ձեռնարկել, և երկուստեք հատուկ ներկայացուցիչներ նշանակեցին. Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Հայաստան-Թուրքիա կարգավորման գործընթացի շրջանակում երկու երկրների հատուկ ներկայացուցիչների առաջին հանդիպումը կայացավ հունվարի 14-ին Մոսկվայում, մյուս երեքը` փետրվարի 24-ին, մայիսի 3-ին և հուլիսի 1-ին Վիեննայում։
ՀԱՅԵՐԵՆ
Русский
English
Դաս. հայերեն
French
