Հայկական ժամանակ. Կառավարության նիստի ժամանակ ՀՀ վարչապետ Նիկոլ Փաշինյանը հայտնեց, որ 44-օրյա պատերազմից հետո մեծ քանակությամբ զենք է անհետացել:
«Ես ՆԳ նախարարին այդ թեմայով տվել եմ հանձնարարականներ, որ ապօրինի զենք-զինամթերքի փնտրտուքի հետ կապված մեթոդաբանությունը պետք է վերանայել, որովհետև մեթոդաբանությունը, որոնցով աշխատել ենք, չի համապատասխանում նոր մարտահրավերներին։ Նոր մեթոդների կիրառությամբ որոշակի՝ ոչ մեծ արդյունքներ կան»,- ասաց Կառավարության ղեկավարը:
Վարչապետի խոսքով՝ երկրում շատացել է նաև օրինական զենքի քանակը։ Ըստ նրա՝ այս հարցը նախկինում քննարկվել է, և ընտրության հարց կա․ օրինական զենքը որքանո՞վ հանդուրժելի պետք է լինի։
«Զենք ձեռք բերելու հնարավորությունները այժմ շատ են։ Ճիշտ կլինի, որ տեսնենք, թե այդ առանձնապես ծանր կամ ծանր հանցագործությունների՝ զենքի կիրառմամբ քանի տոկոսն է օրինական զենքով իրականացվել։ Հայեցակարգային ընտրությունը հետևյալն է․ զենքով ապօրինի հարձակման ենթարկվող մարդկանց մենք արդյոք ուզո՞ւմ ենք վերապահել օրինական զենքով պաշտպանվելու հնարավորություն, թե՞ չէ»,- նկատեց վարչապետը։
ՀՀ գլխավոր դատախազ Աննա Վարդապետյանն էլ հավելեց, որ դատախազության պատժողական քաղաքականությունն էլ այն է, որ երբ դատարանում պատժի վերաբերյալ տեսակետ է հայտնվում ապօրինի զենք պահելու հետ կապված, չի համաձայնեցվում պայմանական դատապարտումը։ Նրա խոսքով՝ դա նպատակ ունի աջակցել ՆԳՆ ոստիկանությանը, որպեսզի մեծանան նախապես կամովի զենքը ներկայացնելու դեպքերը։
ՀԱՅԵՐԵՆ
Русский
English
Դաս. հայերեն
French
