ԵՐԵՎԱՆ, 15 ՀՈՒՆԻՍԻ, ՆՈՅՅԱՆ ՏԱՊԱՆ: Երեւանի պետական համալսարանի (ԵՊՀ) ժուռնալիստիկայի ֆակուլտետում հունիսի 15-ին կայացավ հայտնի լրագրող, գրող-հրապարակախոս, երգիծաբան Արտաշես Քալանթարյանի «Իմ տունը քո տունն է» ժողովածուի շնորհանդեսը: Գրքում ընդգրկված են գրողի վեպերն ու վիպակները, պիեսները, պատմվածքներն ու հոդվածները: «Ա.Քալանթարյանը խորհրդային տարիների լավագույն լրագրողներից էր: Նրա անունը անխզելիորեն կապված է 20-րդ դարի 2-րդ կեսի հայ ժուռնալիստիկայի պատմության հետ»,- նշեց ֆակուլտետի դեկան Գառնիկ Անանյանը: նրա խոսքերով, Ա.Քալանթարյանի, Վարդգես Պետրոսյանի, Վիկտոր Բալայանի շնորհիվ խրուշչովյան ձնհալից հետո Հայաստանում զարգացավ ժուռնալիստիկան, մասնավորապես հրապարակախոսական հոդվածների, ֆելիետոնի ժանրերը: Նշվեց, որ Ա.Քալանթարյանի 75-ամյակի կապակցությամբ Երեւանի Պատանի հանդիսատեսի թատրոնում բեմադրվել է նրա «Հանրապետության օրինակելի քաղաքացին» վիպակը, որի պրեմիերան կկայանա հունիսի 24-ին: Գ.Անանյանը հայտնեց, որ գրողի որդու` Ալեքսանդր Քալանաթարյանի, նախաձեռնությամբ ԵՊՀ-ում բացված գրողի անվան լսարանը շուտով կհամալրվի համակարգիչներով, իսկ այս տարվանից նույնպես նրա նախաձեռնությամբ Ժուռնալիստիկայի ֆակուլտետում կսահմանվի Ա.Քալանթարյանի անվան կրթաթոշակ: ՀՀ Լեզվի պետական տեսչության պետ Լավրենտի Միրզոյանը հայտնեց, որ մինչեւ տարեվերջ «Տավուշ հայրենակցական միության» նախաձեռնությամբ Տավուշի մարզի Չորաթան գյուղի դպրոցի դասասենյակներից մեկը նույնպես կանվանակոչվի գրողի անունով:

---