Մայրութեան եւ գեղեցկութեան տօնի առիթով Երեւանի քաղաքապետ Տարօն Մարգարեանը հիւրընկալել է մայրաքաղաքի կրթութեան, առողջապահութեան, մշակոյթի եւ սպորտի, ինչպէս նաեւ սոցիալական ապահովութեան ոլորտներում աշխատող կանանց: Շնորհաւորելով ներկաներին գարնանային այս գեղեցիկ տօնի կապակցութեամբ, Տարօն Մարգարեանը շնորհակալութիւն է յայտնել նրանց, ինչպէս մեր երկրի, այնպէս էլ մայրաքաղաքի զարգացման գործում ունեցած իրենց գործուն մասնակցութեան ու ներդրած մեծ աւանդի համար. <<Ցանկանում եմ ձեզ երջանկութիւն, յաջողութիւններ անձնական կեանքում եւ ձեր ընտանիքներում: Դուք հայ ընտանիքների սիւներն էք եւ ձեզ ենք մենք վստահել մեր երեխաների դաստիարակութիւնը, մեր առողջութիւնը, մեր սերնդի ապագան եւ, որպէս մեր ապագայի դաստիարակողներ, տօնական այս օրը երախտիքի մեր խօսքն ենք ուղղում ձեզ, սիրելի կանայք>>,-նշել է քաղաքապետը: Երեւանի քաղաքապետարանի տեղեկատուութեան եւ հասարակայնութեան հետ կապերի վարչութիւնից յայտնում են, որ շրջելով ճեմասրահում, Տարօն Մարգարեանը զրուցել է ներկաների հետ, ովքեր իրենց շնորհակալութիւնն են յայտնել քաղաքապետին ջերմ ընդունելութեան համար եւ, օգտուելով առիթից վստահեցրել են, որ այսուհետ եւս պատուով կը կրեն սերունդների դաստիարակութեան իրենց առաքելութիւնը:

---