Յունիսի մէկին տարածել ենք «Չենք լռելու» երիտասարդական նախաձեռնութեան տրամադրած տեղեկութիւնը, թէ Նիդերլանդների Թագաւորութիւնում ՀՀ Սփիւռքի նախարարի խորհրդական, հայկական կազմակերպութիւնները համակարգող միութեան նախագահ Սմբատ Մարտիրոսեանն երիտասարդներինց բարեգործութեան պատրուակով 80-ական եւրոյ է պահանջում` «Արի տուն» ծրագրին մասնակցելու համար` նշելով, որ «այդպէս իրենք առաւել ապահով կը զգան իրենց»: Ստացել ենք Սմբատ Մարտրիոսեանի պատասխանը: Մարտիրոսեանը գրում է. «Յարգելի «Չենք լռելու» երիտասարդական նախաձեռնութիւն, Նիդեռլանդների հայ համայնքը արդէն երրորդ տարին է, ինչ ակտիւօրէն մասնակցում է ՀՀ սփիւռքի նախարարութեան ծրագրերին, որոնց շարքում մեծ կարեւորութիւն է տրւում «Արի տուն»երիտասարդական ծրագրին: Ծրագրին անցած 2 տարիների ընթացքում արդէն իսկ մասնակցել են շուրջ 100 երիտասարդներ, որոնք, հաւատացնում եմ, վերադարձել են միայն մեծ հիացմունքով, գոհունակութեամբ եւ հայրենասիրական նոր զգացմունքերով լիցքաւորուած: Ինչ վերաբերւում է ձեր հաղորդագրութեան մէջ նշուած «Բարեգործութեան պատրուակով 80-ական եւրոյ պահանջելուն», ապա ամենայն պատասխանատուութեամբ յայտնում եմ, որ նմանատիպ ոչ մի դրամահաւաք տեղի չի ունեցել: Հաւանաբար խօսքը գնում է այն մասին, որ նախորդ տարի կամաւոր հիմունքներով մասնակիցներին առաջարկուել է Հայաստանում Նիդեռլանդների հայ համայնքի կողմից բարեգործական որեւէ ձեռնարկ իրականացնելու համար յատկացնել ինչ-որ գումար (գումարի չափը ըստ մասնակիցների հայեցողութեան), ինչը, կրկնում եմ, որեւէ պարտադիր բնոյթ չի կրել: Արդիւնքում հաւաքուած գումարով բարեգործական ձեռնարկ է իրականացուել Գիւմրիի «ֆրիտեօֆ Նանսեն»մանկատան համար: Կարծում եմ բարեգործութիւնը Ձեր չճշտուած տուեալների արդիւնքում յանցագործութիւն ներկայացնելը այդքան էլ ճիշտ չէ: Ասեմ աւելին, Ձեր հաղորդագրոթեան մէջ յիշատակուած «Հոլանդիայի Թագաւորութիւնում ապրող հայերը», որոնք նմանատիպ մեղադրանքներ են հնչեցրել իմ հասցէին, իրականում շանտաժի են ենթարկում ինձ: Հարցը կայանում է նրանում, որ Հոլանդիայում ապաստան ստանալու համար մեր որոշ հայրենակիցնէր, ցաւօք, յանձնւում են տեղի իշխանութիւններին կեղծ փաստաթղթերով, անուններով եւ պատմութիւններով, այդ թւում եւ նշելով ադրբեջանական անուններ, ադրբեջանական բնակավայրեր որպէս ծննդավայր եւ այլն: Բնականաբար այս մարդիկ խնդիրներ են ունենում այն ժամանակ, երբ ցանկանում են Հայաստան վերադառնալ` հաշուի առնելով իրենց վերոյիշեալ կեղծ փաստաթղթերը: Այսպիսով, յիշեալ կարգավիճակն ունեցող մի խումբ մարդիկ, տեղեկանալով, որ մենք ՀՀ սփիւռքի նախարարութեան հետ համատեղ իրականացում ենք Նիդեռլանդներից հայ երիտասարդների այցելութիւնը Հայաստան, դիմեցին ինձ` խնդրելով տրամադրել փաստաթղթեր, որոնցով նրանց երեխաների համար հնարաւոր կը լինէր այցելել Հայաստան: Քանզի նման փաստաթղթեր գոյութիւն չունեն, վերոյիշեալ անձինք բնականաբար մերժում ստացան, որի յետոյ էլ սպառնացին ինձ, որ հայկական լրատաւամիջոցներով կը տարածեն, թէ իբր ՀՀ սփիւռքի նախարարի խորհրդականը գումար է հաւաքում համայնքից: Ահա ամբողջ ճշմարտութիւնը: Հաշուի առնելով, որ «Չենք լռելուն» հէնց երիտասարդական նախաձեռնութիւն է, վերջում միայն կը ցանկանայի Ձեզ յորդորել չտարածել չճշտուած տուեալների հիման վրայ հաղորդագրութիւններ, քանզի չպէտք է մոռանալ, որ նախեւառաջ գործ ունենք սփիւռքահայ մատաղ սերնդի հետ, որին հիասթափեցնելը եւ Մայր Հայրենիքի հետ կապ խարխլելը կարող է անդառնալի հետեւանքներ ունենալ, որոնք բացասաբար կարող են անդրադառնալ Հայաստանում նաեւ Ձեր կողմից բարձրաձայնուած անհանգստացնող երեւոյթենրի վրա»: Աղբիւրը` Հրապարակ

---