Իսրայէլի Քնեսէթում յետաձգուեց Հայոց ցեղասպանութեան ճանաչման հարցի քննարկումը
13-06-2012 13:40:49 | | Ի՞նչ է գրում սփյուռքի մամուլը
Իսրայէլի Քնեսէթում երէկ յետաձգուեց Հայոց ցեղասպանութեան ճանաչման հարցի քննարկումը, այս անգամ` հայկական պատուիրակութեան խնդրանքով:
Հարցը քննարկւում էր Քնեսէթի լիագումար նիստում:
Երկրի օրէնսդիր մարմնում հայկական պատուիրակութիւնը գլխաւորում էին Երուսաղէմի Հայց պատրիարքարանի արտաքին կապերի բաժնի վարիչ Արիս արքեպիսկոպոս Շիրվանեանը եւ Իսրայէլում Հայաստանի պատուոյ հիւպատոս Ցոլակ Մոմջեանը:
Հայկական կողմի խնդրանքը` յետաձգել քննարկումները, բաւարարուեց:
Յատկանշական է, որ լայն խորհրդարանական քննարկումները անցկացուեցին Քնեսէթի դահլիճում, այլ ոչ թէ կրթութեան եւ գիտութեան յանձնաժողովի սենեակում, եւ կրում էին «ի յիշատակ Հայոց ցեղասպանութեան» խորագիրը:
Նիստը բացեց կառավարող «Լիքուդ» կուսակցութեան անդամ, խօսնակ Ռոււեն Ռիւլինը` ընդգծելով, որ ժամանակն է արդէն ճանաչել Հայոց ցեղասպանութիւնը:
Ելոյթով հանդէս եկաւ «Մերեց. կուսակցութեան անդամ Զահաւայ Գալ-Օնը, որը եւս մէկ անգամ կարեւորեց Հայոց ցեղասպանութեան ճանաչման օրինագիծը:
Ելոյթ ունեցաւ ապրիլի 24-ը Հայոց ցեղասպանութեան օր հռչակելու օրինագծի հեղինակ, «Ազգային միասնութիւն» խմբակցութեան ղեկավար Արիէլ Դատը:
Յատկապէս ուշագրաւ էր «Լիքուդ»-ի անդամ, խորհրդարանական կոալիցիայի ղեկավար Զէեւ Էլկինի ելոյթը, որն ուղղակի հարց ուղղեց իր գործընկերներին` ասելով, թէ ինչու՞ շատ արեւմտեան երկրներ վաղուց արդէն ճանաչել են Հայոց ցեղասպանութիւնը, իսկ Իսրայէլը մինչ օրս` ոչ:
«Ադոլֆ Հիտլերը, որի հետ խօսում էին հրէաների ոչնչացման ծրագրի մասին, ուղղակի պատասխանել էր, թէ «ո՞վ է այսօր յիշում հայկական ցեղասպանութիւնը»: Ոչ միայն այս նախադասութեան համար է, որ Իսրայէլը պարտաւոր է յիշել հայկական ցեղասպանութիւնն ու ճանաչել այն, ու լաւ է` ուշ, քան` երբեք., - ծափահարութիւնների ներքոյ յայտարարեց կոալիցիայի ղեկավարը:
Իսրայէլի կառավարութեան ներկայացուցիչ, բնապահպանութեան նախարար Գիլադ Էրդանն էլ, որը իւրաքանչիւր քննարկման ժամանակ ներկայացնում է կառավարութեան դիրքորոշումը` յորդորելով պատգամաւորներին ձեռնպահ մնալ հարցի նկատմամբ որոշում կայացնելուց, այս անգամ իր խօսքն ամփոփեց այսպէս. - «Ես կարծում եմ, որ իսկապէս արժանի կը լինի, եթէ Իսրայէլի կառավարութիւնը պաշտօնապէս ճանաչի Հայոց ցեղասպանութիւնը.:
Այս բաց նիստի արդիւնքը եղաւ այն, որ պատգամաւորները միաձայն որոշեցին երկու բանաձեւի նկատմամբ վերջնական որոշում կայացնել կրթութեան, գիտութեան եւ սպորտի յանձնաժողովի շրջանակներում:
«Ազատութիւն» ռադիօկայանը տեղեկացնում է, որ յիշեալ յանձնաժողովի նախագահ Ալեքս Միլերը, որը կէս տարի ձգձգեց ու ամէն կերպ խոչընդոտում էր Հայոց ցեղասպանութեան հարցով քննարկումների կազմակերպումը, հեռացուել է, եւ այդ պաշտօնում նշանակուել է Աննա Տոււելսը, որը շատ հայանպաստ գործունէութիւն է ծաւալում Քնեսէթում: