Տարոն Մարգարեանը հանդիպել է ճապոնական <<Սոկայ Գակկայ Ինտերնեյշնլ>> միջազգային ասոցիացիայի ներկայացուցիչների հետ: Երեւանի քաղաքապետ Տարօն Մարգարեանը հանդիպել է ճապոնական «Սոկայ Գակկայ Ինտերնեյշնլ» միջազգային ասոցիացիայի ներկայացուցիչների հետ, որոնք Երեւանում են գտնւում Հայաստանի նկարիչների միութեան նախագահի հրաւէրով եւ ներկայացնելու են կազմակերպութեան նախագահ Դայսակու Իկեդայի ֆոտոցուցահանդէսը: Ողջունելով հիւրերին` քաղաքապետն ընդգծել է հայ-ճապոնական համագործակցութեան ներկայ բարձր մակարդակն ու որպէս դրա վառ վկայութիւն յատկանշել է ՀՀ նախագահի պետական այցը Ճապոնիայ եւ մասնաւորապէս «Սոկայ Գակկայ»համալսարան: «Աւելին, լսել եմ, որ այդ այցի ժամանակ համալսարանի սաները հայերէնով փայլուն կատարել են «Էրեբունի-Երեւան» երգը, որը շատ ողջունելի եւ հաճելի է մեզ համար»,-նշել է Տարօն Մարգարեանը: Գնահատելով ասոցիացիայի գործունէութիւնն ուղղուած նոր արժէքների ստեղծմանը` քաղաքապետը պատրաստակամութիւն է յայտնել յետագայ համագործակցութեան եւ համատեղ ծրագրերի իրականացման համար: Նաեւ յաւելել է, որ ճապոնական կազմակերպութիւնների հետ համագործակցութեան շրջանակում 2010 թուականից Երեւանն անդամակցում է նաեւ <<Քաղաքապետերը յանուն խաղաղութեան>> կազմակերպութեանը: Շնորհակալութիւն յայտնելով ջերմ ընդունելութեան եւ պատրաստակամութեան համար` <<Սոկայ Գակկայ Ինտերնեյշնլի>> գործադիր տնօրէն Քէնջի Եօշիգոն ներկայացրել է ասոցիացիայի առաքելութիւնը եւ նշել, որ Դայսակու Իկեդայի ստեղծագործական անձնական ժառանգութիւնը շատ բազմազան է եւ ցուցադրուել է աշխարհի աւելի քան 130 քաղաքներում: Քէնջի Եօշիգոն նաեւ ընդգծել է, որ երեւանեան ցուցահանդէսի կազմակերպումը լաւ հնարաւորութիւն է յարաբերութիւնները զարգացնելու եւ խորացնելու համար: Ինչպէս յայտնում են Երեւանի քաղաքապետարանի տեղեկատուութեան եւ հասարակայնութեան հետ կապերի վարչութիւնից, քաղաքապետ Տարօն Մարգարեանն իր ջերմ ողջոյններն ու բարեմաղթանքներն է փոխանցել ասոցիացիայի նախագահ 84-ամեայ Դայսակու Իկեդային եւ ընդգծել, որ Երեւանը բաց է բոլոր բարեկամների եւ հիւրերի առջեւ:

---