Հարց. Սիրիայում իրավիճակի սրման հետ կապուած եւ նկատի ունենալով հայութեան ներկայութիւնն այդ երկրում, ինչպիսի՞ քայլեր են ձեռնարկւում Հայաստանի կողմից: Պատասխան. Հայաստանի ղեկավարութիւնը ոչ միայն ուշադրութեամբ հետեւում է Սիրիայում իրադարձութիւնների զարգացմանը, այլ նաեւ համապատասխան քայլեր է ձեռնարկել եւ ձեռնարկում տարբեր մակարդակներով եւ ուղղութիւններով: Գործադրուող ջանքերն առաջին հերթին ուղղուած են սիրիահայութեան անվտանգութեան, հայ համայնքի բնականոն կենսագործունէութեան ապահովմանը, պատմամշակութային ժառանգութեան պահպանմանը: Սա այն դէպքերից է, երբ այդ ջանքերի հրապարակային բարձրաձայնումը կարող է նպաստաւոր ազդեցութիւն չունենալ դրանց արդիւնաւէտութեան վրայ, ուստի ես ձեռնպահ կը մնամ դրանք մանրամասնելուց: Կարող եմ յաւելել, որ միջազգային շփումների ժամանակ այս հարցերը գտնւում են երկրի ղեկավարութեան ուշադրութեան կենտրոնում: Համայնքային կառոյցների հետ մշտական կապ է պահպանւում Հայաստանից պարբերաբար այցելող յատուկ բանագնացների, Դամասկոսում ՀՀ դեսպանութեան եւ Հալէպում ՀՀ գլխաւոր հիւպատոսութեան միջոցով: Ակնյայտ է, որ Սիրիայում իրավիճակը բաւականին բարդ է: Առանց անզգոյշ, յուզական յայտարարութիւնների եւ շահարկումներին տեղիք տալու, հետեւելով զարգացումներին, անհրաժեշտութեան դէպքում, հնարաւորութեան սահմաններում, կը ձեռնարկուեն լրացուցիչ քայլեր:

---