ՀՀ կառավարութիւնը հաւանութիւն է տուել «վարչական իրաւախախտումների վերաբերեալ ՀՀ օրէնսգրքում» փոփոխութիւններ եւ լրացումներ կատարելու ՀՀ օրէնքի նախագծին, որը կը նպաստի զօրահաւաքային նախապատրաստութեան միջոցառումների կազմակերպման արդիւնաւէտութեան բարձրացմանը: Կառավարութեան հաւանութիւնն է ստացել «Վարչական իրաւախախտումների վերաբերեալ ՀՀ օրէնսգրքում» մի շարք այլ փոփոխութիւններ եւ լրացում կատարելու օրէնքի նախագիծը, որի ընդունմամբ հնարաւորինս կը նուազեն առանց թոյլտուութեան բացօթեայ առեւտուր իրականացնելու վերաբերեալ իրաւախախտման դէպքերը: Գործադիրը քննութեան է առել ՀՀ ԱԺ պատգամաւոր Հրանտ Բագրատեանի` օրէնսդրական նախաձեռնութեան կարգով ներկայացրած «Նուազագոյն ամսական աշխատավարձի մասին» ՀՀ օրէնքում փոփոխութիւններ եւ լրացումներ կատարելու օրէնքի նախագիծը: Հաւաստելով, որ նուազագոյն աշխատավարձի առաջարկուող բարձրացումը համահունչ է ՀՀ կառավարութեան որդեգրած քաղաքականութեանը, կառավարութիւնը միաժամանակ եզրակացնում է, որ նուազագոյն աշխատավարձի մեծութիւնը եւ կիրարկման ժամկէտը լրացուցիչ հիմնաւորման կարիք ունեն: Նիստում քննարկուել է «Բնապահպանական եւ բնօգտագործման վճարների մասին» ՀՀ օրէնքում փոփոխութիւններ եւ լրացումներ կատարելու օրինագիծը, որը նոյնպէս օրէնսդրական նախաձեռնութեան կարգով ներկայացրել է ԱԺ պատգամաւոր Հրանտ Բագրատեանը: Իր պարզաբանումները ներկայացնելով օրէնքի նախագծի տեղեկանք-հիմնաւորման վերաբերեալ, կառավարութիւնը նպատակայարմար է համարում հանքարդիւնահանման ոլորտի հարկման համակարգի առաջարկուող փոփոխութիւնները քննարկել արդէն իսկ ներդրուած հարկման համակարգի կիրառման առաջին արդիւնքների (2012 թ. արդիւնքով` 2013 թուականին) վերլուծութեան հիման վրայ, եւ դէմ է արտայայտւում ներկայացուած օրինագծի ընդունմանը: Վերը նշուած օրէնքների նախագծերը եւ կառավարութեան եզրակացութիւնները սահմանուած կարգով կը ներկայացուեն ՀՀ Ազգային ժողով: Ինչպէս տեղեկացնում են ՀՀ ԱԳՆ մամուլի, տեղեկատուութեան եւ հասարակայնութեան հետ կապի վարչութիւնից, կառավարութիւնը որոշել է ՀՀ չորրորդ գումարման Ազգային ժողովի քննարկմանը ներկայացուած օրէնքի երկու նախագիծ ներկայացնել ՀՀ Ազգային ժողով:

---