Սեպտեմբերի 19-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը եւ Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսը ներկայ գտնուեցին «Հայաստան-Սփիւռք» 5-րդ համաժողովի բացման արարողութեանը, որի ընթացքում Ամենայն Հայոց Կաթողիկոսն իր օրհնութիւնն ու պատգամը բերեց համաժողովի մասնակիցներին:

 

Ն.Ս.Օ.Տ.Տ. ԳԱՐԵԳԻՆ Բ ԾԱՅՐԱԳՈՅՆ ՊԱՏՐԻԱՐՔ ԵՒ

ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ

«ՀԱՅԱՍՏԱՆ-ՍՓԻՒՌՔ» ՀԻՆԳԵՐՈՐԴ ՀԱՄԱԺՈՂՈՎԻՆ

 

Մեծարգոյ Նախագահ Լեռնային Ղարաբաղի Հանրապետութեան,

Մեծարգոյ Վարչապէտ Հայաստանի Հանրապետութեան,

Սիրելի Վեհափառ եղբայր, հոգեւոր հայրեր,

Պատուարժան մասնակիցներ համաժողովի, սիրելի բարեպաշտ զաւակներ մեր Եկեղեցու,

Յարգարժան հիւրեր:

Մայր Աթոռ Սուրբ Էջմիածնից հոգու բերկրութեամբ եկել ենք ողջունելու ձեզ «Հայաստան-Սփիւռք» հինգերորդ համաժողովի առիթով եւ Հայրապետական Մեր օրհնութիւնը բերելու համաժողովի աշխատանքներին:

Ուրախ է Մեր հոգին, որ աշխարհասփիւռ մեր համայնքներից, Արցախից ու Հայաստանից վերստին  համախմբուել էք` միասնաբար, պատրաստակամ ու յանձնառութեան ոգով քննութեան առնելու մեր կեանքի հրատապ խնդիրները, որոնք անհրաժեշտ ուշադութեան եւ վճիռների կարիքն ունեն ինչպէս Հայրենիքում, այնպէս եւ` Սփիւռքում: Նոյն տեսիլքն ունենք` պաշտպանուած ու զօրեղ, բարօր ու զարգացող դարձնել մեր Հայրենիքը եւ ապահով, շէն ու կենսունակ պահել Սփիւռքը: Այս նպատակների համար մեր ժողովուրդը  մեծ զոհողութիւններ է յանձն առել, միաւորուել ազգաշահ ու հայրենաշեն ծրագրերի շուրջ, որոնցում կարեւոր դեր են ունեցել նաեւ «Հայաստան-Սփիւռք» համաժողովները: 

Հայրենիքի եւ Սփիւռքի միջեւ կապերի ամրապնդումը եւ սերտ գործակցութիւնը մեր կեանքի հրամայական է: Այս գիտակցութեամբ մեր ժողովուրդը թէեւ աշխարհասփիւռ` շարունակում է մնալ մէկ ամբողջութիւն, հոգեւոր մէկ ներաշխարհ` նոյն ինքնութեամբ, ձգտումներով ու յոյսերով: Այսպիսի միասնութեան մէջ է իրական աստուածային ներկայութիւնը եւ մեր կեանքին երկնառաք զօրակցութիւնը, ինչպէս որ Իր անունով համախմբածներին խոստանում է մեր Տէրը Յիսուս Քրիստոս (Մատթ. 18.20):

Հայրենիքի հզօրացման եւ Հայրենիքով միաբանման առանցքում են մէկտեղւում մեր ժողովրդի լուսաւոր գալիքի եւ յարատեւութեան յոյսերն ու հեռանկարները: Այսօր Հայաստանի եւ Արցախի ամէն առումով առաջընթացի եւ անվտանգութեան ու Հայրենի մեր երկրի պաշտպանուածութեան հրամայականն է յառնած ազգային մեր անդաստանում: Վերջին շրջանում հայ-ադրբեջանական պետական սահմանին եւ ղարաբաղայ-ադրբեջանական ուժերի շփման գծում հրադադարի խախտման բազմաթիւ դէպքերը, սահմանամերձ բնակավայրերի տեւական գնդակոծութիւնները ցոյց տուեցին, թէ որքան փխրուն է մեր երկրի խաղաղութիւնը: Մեր Հայրենիքի ու ժողովրդի ապահով ու խաղաղ կեանքին սպառնացող վտանգը կրկին եւ առաւել շեշտում է մեր համախմբուած ու միաբան լինելու անհրաժեշտութիւնը: Յիրաւի, մեր երկրում տակաւին առկայ են անկատարութիւններ, անարդարութեան դրսեւորումներ, զանցանքներ ու յանցանքներ, որոնք, սակայն, չպիտի ստուերեն մեր հայրենասիրութիւնը եւ Մայր Հայրենիքի հանդէպ որդիական սէրն ու հաւատարմութիւնը, այլ առաւել մղեն մեզ մեր ազգն ու պետութիւնը զօրացնելու նախանձախնդրութեան ու միասնական ջանքերի: Այս վստահութեամբ ենք Մեր խօսքն ուղղում ձեզ, սիրելի ներկանէր: 

Մեր այս հաւաքը կարեւորւում է նաեւ նրանով, որ գումարուել է նախօրեակին Հայոց Ցեղասպանութեան 100-ամեայ տարելիցի, որը ազդակ պիտի դարձնենք մեր ժողովրդի կեանքում հոգեւոր մեր արժէքների անխաթարութեան եւ ազգային ինքնութեան գիտակցութեան զօրացման, միասնականութեան եւ լուսաւոր մեր գալիքը կերտելու կամքի ու լաւատեսութեան ամրապնդման: Այս նպատակին պէտք է ուղղուեն պետական, եկեղեցական, ազգային, անհատական մեր անմնացորդ ու ամբողջական ջանքերը, ուժերն ու ծրագրերը, որոնցում դուք նոյնպէս ունէք անմիջական մասնակցութիւն: Պիտի շարունակենք նաեւ մեր համակարգուած գործունէութիւնը` ի խնդիր Հայոց Ցեղասպանութեան համընդհանուր ճանաչման եւ մեր արդար դատի պաշտպանութեան: Հայ Եկեղեցին իր նուիրապետական աթոռներով, իր բոլոր կառոյցներով օրակարգային առաջնահերթութիւններից է նկատում մեր ժողովրդի դէմ գործուած Ցեղասպանութեան միջազգայնօրէն ճանաչման խնդիրը: Մեզ բոլորիս քաջալերում է այն իրողութիւնը, որ վերջին տասնամեակների ընթացքում բազմաթիւ երկրներ, պետական կառոյցներ եւ կրօնական ու հասարակական կազմակերպութիւններ ճանաչել են եւ շարունակում են ճանաչել Հայոց Ցեղասպանութիւնը` գիտակցելով, որ հայ ժողովրդի նկատմամբ արդարութեան իրագործումը էական է աւելի արդար ու խաղաղ աշխարհի կառուցման համար: Մեր Եկեղեցում ընթանում են նաեւ աշխատանքներ` ուղղուած մեր անմեղ զոհերի սրբադասմանը, որը եկեղեցական կանոնով ու ծէսով պիտի կատարենք 2015 թ. ապրիլին, հաւատով, որ մեր նահատակների հաւատքի սխրանքը անմար յիշատակով պիտի հաստատի ու զօրացնի մեր սերունդներին մարտիրոսեալ մեր նախնեաց սրբալոյս յիշատակը մշտավառ պահելու, քրիստոնէական հաւատքի զօրացման, հայրենանուիրումի, ազգային արժէքների պահպանութեան ձգտումներում: 100-ամեայ մեծ տարելիցին մեր անմեղ զոհերի յիշատակը յարգելու լաւագոյն գործը կը լինի, որ 2015 թ. բազմանան մեր ընտանիքները եւ աճեն զաւակներով: Այս կոչն ենք ուղղում մեր ժողովրդին, երիտասարդ մեր ընտանիքներին: 

Այսօր` աշխարհայնացման ընթացքների, այլակարծութեամբ սքօղուած կեղծ ու սին գաղափարների առկայութեան պայմաններում անհրաժեշտ է, որ զօրացնենք նաեւ մեր խնամքն ու ջանքերը` Սփիւռքում եւ Հայրենիքում մեր զաւակներին հայրենեաց աւանդներով կրթելու համար, որպէսզի ապրեն ազգային ջերմ ու կենդանի զգացումով, ազգի, Հայրենիքի սիրով եւ ընթանան հաւատքով, ամուր կանգնած` փրկութեան յոյսի ու յաւիտենական կեանքի ուղիներում: Տէրունախնամ այս ուղիներով պիտի առաջնորդուենք դէպի մեր հայրենեաց բաղձալի եզերքներ եւ մեր կեանքի ոռոգեալ ափեր:

Ազգային մեր կեանքի մտահոգութիւններից են շարունակում մնալ հակամարտութեան իրավիճակներում յայտնուած մեր ժողովրդի զաւակաց խնդիրները: Տագնապահարոյց է իրավիճակը Մերձաւորարեւելեան տարածաշրջանում, պատերազմական դրութիւն է Ուկրաինայում, որտեղ ունենք հայկական համայնքներ: Յատկապէս Իրաքում եւ Սիրիայում իսլամիստների բռնութիւններն ու ահաբեկչական գործողութիւնները սպառնալիք են դառնում խաղաղ բնակչութեան, նաեւ` քրիստոնէական, այդ թւում հայ համայնքների համար` ստիպելով լքել իրենց բնակավայրերը: Սիրիայում հակամարտութեան բռնկման առաջին օրերից յորդորել ենք Սփիւռքի մեր Թեմակալներին հնարաւոր բոլոր միջոցները գործադրելու` պետական, դիւանագիտական, միջազգային, էկումենիկ, իրաւապաշտպան կառոյցների եւ կազմակերպութիւնների առջեւ բարձրաձայնելու խնդիրը, որպէսզի անհրաժեշտ քայլերի ձեռնարկումով տեղահանուած ազգաբնակչութիւնը հնարաւորինս շուտ կարողանայ վերադառնալ սեփական օջախները եւ շարունակել իր խաղաղ կեանքը: Միաժամանակ կոչ ենք ուղղել` առաւել ջանքեր ներդնել եւ քաջալերել հաւատացեալ հայորդիներին` բարոյական ու նիւթական աջակցութեամբ սատարելու իրենց քոյրերին ու եղբայրներին, որպէսզի յաղթահարեն փորձութիւնները, ինչպէս նաեւ իրականացրել ենք Մայր Աթոռի ծրագրերը` օգնելով տուժած համայնքներին, Հայրենիք ներգաղթած հայորդիներին: 

Սիրելիներ, եղբայրսիրութեան, հայրենասիրութեան ու միաբանութեան ոգին, խաղաղասիրութեան, արդարութեան ու ճշմարտութեան արժէքները մեր հոգուն միշտ զօրութիւն են տալու, մեր բազկին` ուժ եւ մտքին իմաստութիւն: Այդ արժէքներով պիտի շէնացնենք մեր Հայրենիքը, կենսունակ պահենք Սփիւռքը, յոյս ու ապաւէն դառնանք եւ նեցուկ լինենք միմեանց` դժուարութիւնները յաղթահարելու եւ մեր իղձերն իրագործելու:

Աղօթքով առ Աստուած արդիւնաւոր ընթացք ենք մաղթում այս համաժողովի աշխատանքներին:

Հայցում ենք Աստծոյ օրհնութիւնը մեր Հայրենիքին եւ աշխարհասփիւռ մեր ժողովրդի կեանքին:

Թող Աստծոյ սէրը, շնորհները լինեն մեզ հետ եւ բոլորի. ամէն:

 

  -   Հասարակութիւն