Սեպտեմբերի 5-ին լրանում է «Նարեկացի» արուեստի միութեան (ՆԱՄ) երեւանեան մասնաճիւղի հիմնադրման եօթերորդ տարելիցը: Յայտնելով այս մասին նոյն օրուայ ասուլիսում, Նամ-ի հիմնադիր Նարեկ Յարութիւնեանը նշեց, որ միութիւնը շահոյթ չհետապնդող եւ բացառապէս բարեգործական գործունէութեամբ զբաղուող հասարակական կազմակերպութիւն է: Այն հիմնադրուել է 2002թ.-ին Ամն-ում: Նամ-ի առաքելութիւնն է մշակել, աջակցել, հովանաւորել եւ իրականացնել հայ արուեստի եւ հոգեւոր մշակոյթի ժառանգութեան պահպանմանը, նորացմանը ու զարգացմանն ուղղուած ծրագրեր եւ նախաձեռնութիւններ: Իր եօթնամեայ գործունէութեան ընթացքում միութիւնը թողարկել է շուրջ երկու տասնեակ արժէքաւոր ձայնասկաւառակներ, կազմակերպել 3000 համերգ, ինչպէս նաեւ` տարբեր ցուցահանդէսներ, վարպետութեան դասեր: Նամ-ը ունի մասնաճիւղեր Երեւանում եւ Շուշիում: Նամ-ի Շուշիի մասնաճիւղը ստեղծուել է 2004թ-ին: «Այն աւելի շուտ կրթական հաստատութիւն է, որը կերտում է նոր սերունդ, նոր շունչ»,- ասաց Ն.Յարութիւնեանը: Շուշիի մասնաճիւղի հիմանական նպատակը, նրա խօսքերով, պատերազմից ուժասպառ քաղաքի մշակութային զարթօնքին նպաստելն է: Ասուլիսին ներկայ երգահան-կատարող Ռուբեն Հախուերդեանը նշեց, որ Նամ-ի հետ համատեղ գործունէութեան շնորհիւ ստեղծուել է մանկական երգերի ձայնասկաւառակ: Նա նաեւ տեղեկացրեց, որ ընթացքի մէջ են «Կտակ» նոր ձայնասկաւառակի պատրաստման աշխատանքները: Անդրադառնալով հայկական մշակոյթի ցաւոտ խնդիրներին, Ռ.Հախուերդեանը յայտարարեց. «Այսօր մշակութային պատերազմ է գնում»։ Նրա խօսքերով, այս պատերազմում պարտութեան դէպքում իրական պատերազմում պարտութիւնն ախուսափելի է:

---