ԵՐԵՎԱՆ, 27 ԱՊՐԻԼԻ, ՆՈՅՅԱՆ ՏԱՊԱՆ: «Վերջին տարիներին Երեւանի Եղիշե Չարենցի անվան Գրականության եւ արվեստի թանգարանի ֆոնդերը համալրվում են միմիայն նվիրատվությունների շնորհիվ, քանի որ լինելով պետական` թանգարանը նյութեր գնելու համար չի օգտվում պետական միջոցներից»: «Նոյյան տապանի» թղթակցի հետ զրույցում այս մասին ասաց թանգարանի տնօրեն, գրականագետ Հենրիկ Բախչինյանը: Նա նշեց, որ արդեն երկու տարի է` Հրաչյա Աճառյանի դուստրը թանգարանին առաջարկում է գնել իր հոր ձեռագրերը եւ անտիպ աշխատությունները, որոնց թվում նաեւ «Հայ գաղթավայրերի պատմություն» աշխատությունը: Արխիվը գնահատվել է մոտ 1500 դոլար, սակայն թանգարանն ի վիճակի չէ նույնիսկ այդ գումարը ձեռք բերել: Հայտնի դարձավ նաեւ, որ օրերս թանգարանին իր արխիվի մի մասն է նվիրաբերել պարսկահայ մշակութային եւ հասարակական գործիչ Էմիլ Հակոբյանը: Այնտեղ ընդգրկված են 100-ի հասնող ձեռագիր նյութեր, լուսանկարներ, փաստաթղթեր: Էմիլ Հակոբյանի նվիրատվությունները թանգարանին շարունակվելու են, քանի որ վերջինս մտադիր է թանգարանին հատկացնել իր ողջ հավաքածուն, որտեղ պահվում են սփյուռքահայ եւ հատկապես պարսկահայ մշակութային գործիչների արխիվները:

---