Նախագահ Սերժ Սարգսյանն այսօր Հայաստանի նկարիչների միությունում ներկա է գտնվել Մշակույթի նախարարության նախաձեռնությամբ արդեն չորրորդ տարին անընդմեջ իրականացվող արվեստների ավանդական «ART EXPO» ցուցահանդեսի բացմանը, որն արվեստի ցուցահանդեսից վերածվել է նոր ծրագրերի, գաղափարների, նախաձեռնությունների ներկայացման մշակութային հարթակի: Ինչպես "Նոյյան Տապան"-ին տեղեկացրեցին ՀՀ նախագահի մամլո գրասենյակից, 2012 թվականին «ART EXPO»-ն կանցնի նաեւ գրի, գրականության եւ գրավոր ժառանգության խորհրդի ներքո՝ նկատի առնելով, որ ՅՈՒՆԵՍԿՕ-ի կողմից Երեւանը 2012 թվականին հռչակվել է գրքի համաշխարհային մայրաքաղաք, նաեւ այն հանգամանքը, որ այս տարի լրանում է հայ գրատպության 500-ամյակը: Ցուցահանդեսում հայ գրատպության 500-ամյակի եւ Երեւանը 2012 թվականին գրքի համաշխարհային մայրաքաղաք հռչակելու առթիվ բացված գրառումների գրքում Նախագահ Սերժ Սարգսյանն առաջին գրառումն է կատարել: Հանրապետության ղեկավարը, մասնավորապես, գրել է. «Հազարամյակների պատմություն ունեցող մեր մայրաքաղաք Երեւանն իր մեջ ամփոփելով անցյալի մայրաքաղաքների՝ Վանի, Արմավիրի, Երվանդաշատի, Արտաշատի, Տիգրանակերտի, Վաղարշապատի, Դվինի, Բագարանի, Շիրակավանի, Կարսի ու Անիի երբեմնի փառքն ու հիշատակը, աշխարհասփյուռ հայության հարատեւության ու ապագայի խորհրդանիշն է: Ուստի, բոլորիս սրբազան պարտքն է պահել ու պահպանել մեր ազգի բաբախող այդ սիրտը, օր-օրի այն դարձնել բարեկեցիկ ու գեղեցիկ»: Ցուցահանդեսում շրջելուց հետո, Հանրապետության նախագահը Նկարիչների միության նախասրահում գործող «գրական սրճարանում» թեյի սեղանի շուրջ հանդիպում կունենա մտավորականների հետ, որից հետո պարգեւներ կհանձնի Հայ գրատպության 500-ամյակի միջոցառումները նախապատրաստող պետական հանձնաժողովի կողմից հայտարարված «Գիրքը, որը փոխեց իմ կյանքը» թեմայով շարադրությունների եւ «Լեզուն հայրենիք է» թեմայով էսսեների մրցույթների հաղթողներին: Մրցույթներին մասնակցել են Հայաստանի բուհերի եւ հանրակրթական դպրոցների ուսանողներ ու աշակերտներ: Մրցույթներում հաղթած երկու ուսանողներն որպես մրցանակ կստանան Հայ գրատպության 500-ամյակի միջոցառումները նախապատրաստող պետական հանձնաժողովի հավաստագրերը եւ հնարավորություն՝ տարվա ընթացքում մասնակցելու արտերկրում իրականացվող որեւէ գրական նախագծի, իսկ հաղթած աշակերտին հավաստագրից բացի, «Արտեկ» մանկական միջազգային ճամբարում հանգստանալու հնարավորություն կտրվի:

---