ԵՐԵՎԱՆ, 14 ՀՈՒՆԻՍԻ, ՆՈՅՅԱՆ ՏԱՊԱՆ: Հայաստանի փոխարտգործնախարար Արման Կիրակոսյանը հունիսի հունիսի 14-ին ընդունել է ՄԱԿ-ի Մարդու իրավունքների պաշտպանների իրավիճակի հարցերով հատուկ զեկուցող Մարգարետ Սեկագյային, ով Հայաստան է ժամանել ՀՀ կառավարության կողմից 2006թ.-ին ՄԱԿ-ի հատուկ ընթացակարգերին փոխանցված մշտական հրավերի հիման վրա: Ինչպես նշված է ՀՀ ԱԳՆ Մամուլի եւ տեղեկատվության վարչության հաղորդագրությունում, նման հրավեր ՄԱԿ-ի հատուկ ընթացակարգերին փոխանցել են հիմնականում Արեւմտյան Եվրոպայի երկրները: Իսկ ԱՊՀ երկրներից նման հրավեր ներկայացրել են միայն Հայաստանը, Ղազախստանը եւ Ուկրաինան: Ընդհանուր առմամբ, ՄԱԿ-ի կողմից սահմանվել եւ գործում են 39 հատուկ զեկուցողներ: Ներկայացնելով Հայաստանի իշխանությունների կողմից մարդու իրավունքների պաշտպանի կառույցի ամրապնդմանն ուղղված քայլերը, այդ թվում ֆինանսական աջակցությունը, Ա.Կիրակոսյանն ընդգծել է կառույցի անկախ գործելու կարեւորությունը: Նշվել է, որ Հայաստանում գրանցվել եւ գործում են 3000-ից ավելի հասարակական կազմակերպություններ: Հանդիպմանը քննարկվել են նաեւ մայիսին Հայաստանի կողմից ներկայացված համընդհանուր պարբերական վերանայման գործընթացի արդյունքները: Նշվել է, որ գործընթացի շրջանակներում ստանձնած պարտավորություններն ի կատար կածվեն սեպտեմբերին կայանալիք Մարդու իրավունքների խորհրդի նիստում զեկույցի պաշտոնական հաստատումից հետո: Ստանձնված պարտավորությունները կներկայացվեն ՀՀ պետական կառույցների, հասարակական կազմակերպությունների եւ քաղաքացիական հասարակության ներկայացուցիչների շրջանում: Պայմանավորվածություն է ձեռք բերվել Հայաստանում կայանալիք հանդիպումների ու այցելությունների արդյունքում կրկին հանդիպել` դիտարկումները համատեղ քննարկելու եւ նկատառումները ներկայացնելու համար:

---