«Տաշիր գրուպ»-ի ղեկավարը Forbes-ի ցուցակում 353-րդ տեղն է զբաղեցնում
05-03-2013 16:31:58 | Հայաստան | Միջազգային
Forbes հանդեսը հրապարակել է աշխարհի միլիարդատերերի ցուցակը։ 1426 անուն պարունակող այդ ցուցակում միլիարդատերերի թվով առաջինը Միացյալ Նահանգներն է, որտեղ 442 մարդ միլիարդից ավելի կարողություն ունի, այնուհետեւ Ասիական-Խաղաղօվկիանոսյան տարածաշրջանն է` 386, հետո` Եվրոպան, որտեղ 366 միլիարդատեր է բնակվում, Հարավային Ամերիկան` 129, իսկ Մերձավոր Արեւելքն ու Աֆրիկան 103 միլիարդատեր ունեն:
Աշխարհի ամենահարուստների ընդհանուր կարողությունը, ըստ Forbes-ի, 5.4 տրիլիոն է կազմում, ինչը նախորդ տարվա 4.6 միլիարդի համեմատությամբ զգալի աճ է արձանագրել։
Աշխարհի հարուստների այս ցուցակում տեղ են գտել նաեւ հայկական ազգանուններ, չնայած Հայաստանի քաղաքացիություն նրանց անվան դիմաց Forbes-ը չի նշում:
Հայազգի գործարար, Ռուսաստանի քաղաքացի Սամվել Կարապետյանը 3.8 միլիարդ դոլար կարողությամբ Forbes-ի ցուցակում 353-րդ տեղն է զբաղեցնում, նա Ռուսաստանում 29-րդն է: Forbes-ի էջում Կարապետյանի մասին գրված է, որ նա անշարժ գույքով զբաղվող «Տաշիր գրուպ»-ի ղեկավարն է, ում պատկանում է 24 առեւտրի կենտրոն, 7 գրասենյակային շենք եւ 7 հյուրանոց, ծնվել է Հայաստանում եւ 1990-ականներին տեղափոխվել Կալուգա:
Հայազգի միլիարդատեր, Lincy հիմնադրամի ղեկավար 95-ամյա Քըրք Քրքորյանը 3.3 միլիարդով Forbes-ի ցուցակում 412-րդն է, Միացյալ Նահանգներում 135-րդ տեղն է զբաղեցնում:
Ցուցակում է նաեւ Էդուարդո Էռնեկյանը, Արգենտինայում նա երկրորդ հարուստն է համարվում, իսկ Forbes-ի ցուցակում 1.8 միլիարդ դոլար կարողությամբ 831-րդ հորիզոնականում է։ Էռնեկյանը Եվրոպայում եւ Լատինական Ամերիկայում 49 օդանավակայանների տեր է, Արգենտինայի փոստային ծառայությունն է նրան պատկանում, հազարավոր հեկտարների վրա նա արտադրում է գինի եւ ձիթապտուղ:
Վրաստանից ցուցակում է երկրի վարչապետ Բիձինա Իվանիշվիլին` 5.3 միլիարդ դոլարով, նա միլիարդատերերի ցուցակում 229-րդն է:
Forbes-ը չորրորդ տարին անընդմեջ աշխարհի ամենահարուստ մարդ է համարում Կարլոս Սլիմին Մեքսիկայից` 73 միլիարդ դոլար ունեցվածքով: Նրա ամենաշահութաբեր ընկերությունը Լատինական Ամերիկայում կապի ծառայությունն ապահովող America Movil-ն է:
Սլիմին հետեւում է Microsoft-ի հիմնադիր Բիլ Գեյթսը. 67 միլիարդ կարողությամբ նա առաջինն է Միացյալ Նահանգներում:
«Ազատության» փոխանցմամբ, Forbes-ի ցուցակի երրորդ հորիզոնականում Zara իսպանական բրենդի սեփականատեր Ամանսիո Օրտեգան է։ Նա ամենամեծ շահույթն է ունեցել այս տարի` գրեթե 20 միլիարդ դոլար, եւ իր 57 միլիարդ կարողությամբ առաջինն է Իսպանիայում:
ՀԱՅԵՐԵՆ
Русский
English
Դաս. հայերեն
French
