Բելառուսի նախագահ Ալեքսանդր Լուկաշենկոն արտասվում էր Ուգո Չավեսի հրաժեշտի արարողությանը (ՏԵՍԱՆՅՈՒԹ)
09-03-2013 17:17:20 | ԱՄՆ | Միջազգային
Նախօրեին Վենեսուելայի առաջնորդ Ուգո Չավեսի հրաժեշտի արարողությանը որդու հետ մասնակցող Բելառուսի նախագահ Ալեքսանդր Լուկաշենկոն արտասվում էր երկրի պետական օրհներգի հնչյունների ներքո:
Երբ օրհներգը ավարտվել է, փոխնախագահ Նիկոլաս Մադուրոն Ուգո Չավեսի դագաղին է դրել ազատագրական պայքարի հերոս Սիմոն Բոլիվարի սրի կրկնօրինակը, այնուհետեւ հերթով մոտեցել են տարբեր երկրների պատվիրակությունների ներկայացուցիչները, հայտնում է «Ինտերֆաքս-Ուկրաինան»:
Դագաղի մոտ կանգնել են Ալեքսանդր Լուկաշենկոն եւ Իրանի նախագահ Մահմուդ Ահմադինեժադը: Իրանի առաջնորդը համբուրել է Չավեսի փակ դագաղը: Նրանց հաջորդել է Ռուսաստանի արտգործնախարար Սերգեյ Լավրովը: Չավեսին առանձին հրաժեշտ տալու էին եկել նաեւ վենեսուելացի հայտնի մարզիկները:
55 երկրների պատվիրակություններ են հրաժեշտ տվել վենեսուելական կոմանդանտեին, որը վախճանվել էր այս շաբաթ՝ 58 տարեկան հասակում: Պատվիրակություններից 32-ը գլխավորում էին պետությունների ղեկավարները: