Թատերական Online մրցանակաբաշխության շուրջ խոսակցություններն անդադար էին: Բոլորը անհամբեր սպասում էին մրցանակաբաշխությանը, որը խոստացել էր լինել նախորդից բավականին տարբերվող:

Մարտի 26-ին Երևանի պետական տիկնիկային թատրոնում տեղի ունեցավ Online մրցանակաբաշխության մամուլի ասուլիսը, որին անմիջապես հաջորդեց մրցանակների հանձնման արարողությունը: 

Օրը պատահական չէր ընտրված. «Թատրոնի միջազգային օրվան ընդառաջ` որոշեցինք մրցանակաբաշխությունն անել մարտի 26-ին»,-մամուլի ասուլիսի ժամանակ նշեց մրցանակաբաշխության ադմինիստրատոր Նարեկ Մանուչարյանը: Ինչպես նշեցին կայքի մրցանակաբաշխության հիմնադիր Ֆրունզե Գևորգյանը և մամուլի քարտուղար Լիլիթ Տերտերյանը, այս անգամ մրցանակաբաշխության կանոնների մեջ որոշ փոփոխություններ են մտցվել. այս տարի մեկ IP-ից հնարավոր էր քվեարկել մեկ անգամ, քվեարկությունը փակ էր, որն ավելի էր հետաքրքրություն առաջացրել, ի տարբերություն անցած տարվա մրցանակաբաշխության` այս տարի անվանակարգերը 13-ն էին 10-ի փոխարեն, իսկ «Տարվա Online թատերական քննադատ» անվանակարգը վերանվանվել էր` դառնալով «Տարվա Online մշակութային լրագրող»: Մրցանակաբաշխության մասնակիցները պատահական չէին ընտրվել. նրանք թատերական այն գործիչներն էին, ովքեր 2012 թվականին Online տիրույթում ամենաշատն էին ակտիվ եղել: Քվեարկությունը սկսվել էր փետրվարի 20-ին, ավարտվել մարտի 15-ին: 

Ասուլիսից հետո սկսվեց մրցանակների հանձնման արարողությունը, որը վարում էին դերասաններ Հարություն Անդոյանն ու Ալլա Բունիաթյանը: Միջոցառումը սկսվեց անսովոր կերպով, հաղորդավարները միմյանց հետ սկզբից շփվում էին վիրտուալ հարթակում` Skype-ով, որից հետո Online տիրույթից անցան իրական հարթակ: Մրցանակաբաշխության ընթացքում հյուրերին հետաքրքիր անակնկալ մատուցվեց` հումորային հոլովակի տեսքով:

Իսկ ովքե՞ր 13 անվանակարգերի հաղթողները, ներկայացնում ենք ստորև: 

 

Տարվա Online թատրոն - Գյումրու պետական դրամատիկական թատրոն

Տարվա Online թատերախումբ - «Էպսիդոն»

Տարվա Online փառատոն - Մնջախաղի միջազգային փառատոն

Տարվա Online մշակութային լրագրող - Մանանա Հովակիմյան

Տարվա Online հարմարեցված պիես - «Հացի խնդիրը» 

Տարվա Online բեմանկարիչ - Տաթև Հարությունյան

Տարվա Online մանկական ներկայացում - «Մաշայի և արջի արկածները»

Տարվա Online պարային-երաժշտական ներկայացում – «Կյանքի 5 տարրերը»

Տարվա Online ներկայացում - «Հացի խնդիրը»

Տարվա Online պրոդյուսեր - Տիգրան Վիրաբյան

Տարվա Online բեմադրող ռեժիսոր - Նարինե Գրիգորյան

Տարվա Online դերասանուհի - Տաթեւ Ղազարյան

Տարվա Online դերասան - Արմեն Մարգարյան

Տպավորիչ էր հատկապես «Տարվա Online դերասան» անվանակարգի հաղթողին հայտարարելու հատվածը: Անվանակարգի հաղթողին պետք է հայտարարեր անցած տարվա այդ անվանակարգում հաղթող Արմեն Մարգարյանը: Արմենին բեմ հրավիրեցին, նա բացեց ծրարը և անսպասելիությունից չկարողացավ ոչինչ ասել. ծրարում գրված էր հենց իր անունը:

Միջոցառման ավարտից հետո հյուրերին սպասվում էր հյուրասիրություն:

Նշենք, որ այս նախագծի նպատակն է հասարակությանը ներկայացնել և լուսաբանել հայկական թատրոնը, լսարանին հնարավորություն տալ ճանաչելու հայ թատերական գործիչներին և այն մարդկանց, ովքեր որևէ կերպ առնչվում են թատրոնի հետ:

Ինչպես իրենց խոսքում նշեցին մրցանակաբաշխության կազմակերպիչները, մրցանակաբաշխությունը կկրի շարունակական բնույթ: 

 

Քրիստինա Բոյաջյան

 

Նոյյան տապան  -   Մշակույթ