Հարյուրավոր շրջանավարտներ հրաժեշտ տվեցին Երևանի Վ. Բրյուսովի անվան պետական լեզվաբանական համալսարանին
11-07-2013 12:35:03 | Հայաստան | Գիտություն եւ տեխնոլոգիաներ
«Երդվում եմ՝ ձեռք բերված գիտելիքները ծառայեցնել պետության զարգացմանն ու հզորացմանը, լինել հայրենիքի և ազգի արժանի զավակ, ջանք չխնայել պետության բարգավաճման և աշխարհում ուրույն տեղն ունենալու գործում։ Երդվում եմ՝ իմ գիտելիքները, կամքը, ձգտումներն ու հոգու կրակը փոխանցել հաջորդ սերնդին»,- այսպիսի երդմամբ հարյուրավոր շրջանավարտներ հրաժեշտ տվեցին Երևանի Վ. Բրյուսովի անվան պետական լեզվաբանական համալսարանին (ԵՊԼՀ)։
Հուլիսի 10-ին «Արամ Խաչատրյան» համերգասրահում Հայաստանի երիտասարդական հիմնադրամը և Երևանի Վ. Բրյուսովի անվան պետական լեզվաբանական համալսարանի ուսանողական խորհուրդը կազմակերպել էին ԵՊԼՀ 2012-2013 ուսումնական տարվա բակալավրիատի և մագիստրատուրայի շրջանավարտների դիպլոմների հանձնման հանդիսավոր արարողությանը։
ԵՊԼՀ շրջանավարտներից 159-ն այս տարի արժանացել են կարմիր դիպլոմի։ Ողջունելով բոլոր շրջանավարտներին՝ բուհի ռեկտոր Գայանե Գասպարյանը բարի երթ և հաջողություններ մաղթեց վերջիններիս։ Ռեկտորի խոսքով՝ լեզվաբանական համալսարանը Հայաստանում այսօր դասվում է ամենաորակյալ կրթություն մատուցող, ամենամրցունակ համալսարանների, աշխատաշուկայում ամենամեծ պահանջարկ ունեցող բուհերի թվին։ Նա պատգամեց շրջանավարտներին միշտ և ամենուր բարձր պահել բրյուսովականի անունը։
Ավարտական միջոցառմանն ուղեկցվում էր համերգային ծրագրով։ Ելույթ ունեցան Էրիկը, Սոֆի Մխեյանը, Արմինկան, Անդրեն և Արամ MP3-ն, «Վիտամին» ակումբը: