Պաշտոնավարման տարիներին Հայաստանի մարդու իրավունքների
պաշտպանին հաջողվել է չձուլվել իշխանական եւ ընդդիմադիր կողմերին
02-02-2011 16:44:00 | Հայաստան | Իրավունք
ԵՐԵՎԱՆ, 2 ՓԵՏՐՎԱՐԻ, ՆՈՅՅԱՆ ՏԱՊԱՆ: Թեեւ անցած 5 տարիների
ընթացքում Հայաստանի մարդու իրավունքների պաշտպանի ինստիտուտին
հաջողվել է չձուլվել իշխանական կամ ընդդիմադիր կողմի հետ, սակայն
չի հաջողվել ամբողջությամբ փարատել կասկածներն այս առնչությամբ:
Իր, ըստ ամենայնի վերջին, փետրվարի 2-ի ասուլիսում այս մասին
հայտարարեց Հայաստանի մարդու իրավունքների պաշտպան Արմեն
Հարությունյանը:
Պաշտպանն ի պատասխան հարցերից մեկի իրավապահ մարմինների
«լուրջ ձախողում» որակեց այն, որ մինչեւ օրս չեն բացահայտվել
2008թ.-ի մարտի 1-2-ին սպանությունների դեպքերը: Ա.Հարությունյանի
կարծիքով, իրավապահ մարմինները արել են օրենքով նախատեսված բոլոր
գործողությունները, սակայն նա դժգոհ է, թե ինչպես են դա արել:
Նախորդ օրը Ա.Հարությունյանը հրաժարականի դիմում է
ներկայացրել Կենտրոնական Ասիայում Միացյալ Ազգերի Կազմակերպության
Մարդու իրավունքների գլխավոր հանձնակատարի տարածաշրջանային
ներկայացուցչի պաշտոնը ստանձնելու կապակցությամբ եւ ներկայիս
պաշտոնում կպաշտոնավարի մինչեւ փետրվարի 11-ը: